Բավարար ապացույցներ են ձեռք բերվել՝ հայտարարելու համար, որ «Սիվիլիթաս» հիմնադրամի նախագահ Վարդան Օսկանյանը յուրացրել է իրեն և իր հիմնադրամին վստահված խոշոր դրամական միջոցները և դրանց օրինականացման ուղղությամբ կատարված գործունեությամբ ծանր հանցագործություն գործել: Այս մասին այսօր ԱԺ-ում հայտարարեց ՀՀ գլխավոր դատախազ Աղվան Հովսեփյնաը:
Մանրամասներ ներկայացնելով «Հանթսման Բիլդինգ Թրոդաքթս»-ի կողմից հիմնադրամին ֆինանսական միջոցների տրամադրման, ստացման և Օսկանյանի կողմից «յուրացման» գործընթացից՝ Ա. Հովսեփյանը նշեց, որ հատկացված միջոցներից 181 հազար դոլարը հիմնադրամի նախագահի կողմից օգտագործվել է անձնական կարիքները հոգալու, այլ ո՛չ բացառապես բարեգործական նպատակներով: «Արտասահմանից կանխիկ ստացված գումարները Վարդան Օսկանյանը ստացել է «ՎՏԲ» բանկի իր անձնական հաշվեհամարի վրա և հետո փոխանցել հարազատների բանկային քարտերի, հաշվեհամարների վրա՝ հետագայում յուրացնելով դրանք»,- ասաց նա:
ՀՀ գլխավոր դատախազի խոսքով, «Սիվիլիթաս» հիմնադրամը այս ողջ ընթացքում օրենքով սահմանված կարգով թափանցիկ կերպով չի ներկայացրել իր ֆինանասական գործողությունները, իսկ 2012 թվականի խորհրդարանական ընտրություններին մասնակցելու նպատակով Օսկանյանի ներկայացրած հայտարարագում, որպես անձնական ունեցվածք, նշվել է ընդամենը 1 մլն 400 հազար դոլար գումար, այն դեպքում, երբ պատգամավորի անձնական ունեցվածքը զգալիորեն մեծ է նշված չափից:
«Քրեական գործի նախաքննությունը շարունակվում է: Գործի շրջանակներում ձեռք են բերվել բանկային գաղտնի տվյալներ, որոնք դեռևս հրապարակման ենթակա չեն: Քրգործում առկա են մի շարք ցուցմունքներ, հաշվետվություններ, հիմնադրամի հաշվապահական հաշվառումը, դատահաշվապահական փորձաքննության տվյալները, բազմաթիվ էլեկտրոնային նամակներ, պայմանագրեր, այլ ապացույցներ: Ապացույցների համակցությունը թույլ է տալիս Վարդան Օսկանյանին ՀՀ Քրեական օրենսգրքի 190 հոդվածի երրոդ մասի առաջին կետով որպես մեղադրյալ ներգրավել տվյալ քրգործում: Հետևաբար, ԱԺ-ին միջնորդում եմ համաձայնություն տալ՝ նրան որպես մեղադրյալ ներգրավելու այդ քրգործում»,- ասաց Աղվան Հովսեփյանը:
Հիշեցնենք, որ ԱԱԾ քննչական վարչությունը հանցավոր ճանապարհով ստացված առանձնապես խոշոր չափերով եկամուտներն օրինականացնելու հատկանիշներով (փողերի լվացում) քրեական գործ է հարուցել ՀՀ ՔՕ 190-րդ հոդվածի 3-րդ մասի 1-ին կետին համապատասխան: Գործի շրջանակում քննությունը դիտարկում է այն փաստերը, համաձայն որոնց՝ Հայաստանում հիմնադրված «Հանթսման Բիլդինգ Փրոդաքս» ՍՊԸ-ի 100% բաժնետոմսերը, որ պատկանում են ԱՄՆ-ում գրանցված «Պոլիմեր մաթերիալս» և «Հանթսման Ինթերնեյշընըլ» ձեռնարկություններին, վաճառվել են 2 մլն դոլարով, բայց հարկերից խուսափելու նպատակով գործարքը չի ներկայացվել հարկային մարմին, իսկ ամերիկյան կողմի՝ բարեգործական նպատակներով գործածելու համար տրամադրած 1 մլն դոլարը անձնական կարիքների համար է ծախսվել:
Քննության տվյալներով, դրանից բացի, «Սիվիլիթաս» հիմնադրամը, խախտելով իր իսկ կանոնադրությունը և գործող օրենսդրության պահանջները, չի ներկայացրել 2011 թ. հաշվետվությունը: Հիմնադրամի հիմնադիր Վարդան Օսկանյանը հայտարարել է, որ դա քաղաքական պատվեր է:
«Սիվիլիթաս» հիմնադրամը հիմնադրվել է 2008 թ. ՀՀ նախկին արտգործնախարար Վարդան Օսկանյանի կողմից: 2012 թ. մայիսի 6-ի ընտրություններից առաջ «Բարգավաճ Հայաստան» կուսակցություն մտնելուց հետո Օսկանյանը հրաժարվել էր Հիմնադրամի խորհրդի նախագահի պաշտոնից:
