Խորհրդարանական ընտրություններից մեկ օր առաջ Վրաստանի նախագահը Մցխեթից դիմել է ժողովրդին:
Նա իր ելույթում ուշադրություն է հրավիրել վաղվա օրվա վրա: Ըստ նրա` վաղը այն կարևորագույն պահն է, երբ վրաց ժողովուրդը որոշելու է Վրաստանի ապագան:
«Վաղը որոշվելու է, թե մենք կպահպանե՞նք այն ազատությունը, որի համար պայքարել են մեր նախնիները` զորաբերելով իրենց: Վստահ եմ, որ սահմանի մոտ և սահմանից այս կողմ ընթանում է ուժերի աննախադեպ կենտրոնացում, որոշ մարդկանց` ընտրությունը խափանելու ծրագրերը չեն խանգարի ժողովրդավարության հաղթանակին: Մեր երկրի ապագան վաղն է որոշվում: Վաղը դարակազմիկ հարց է լուծվում. ի՞նչ պետություն ենք մենք ցանկանում տեսնել: Վաղը մեր թշնամին վերջին հնարավորությունը կունենա մեզ անկախության ուղուց շեղելու համար, բայց ես վստահ եմ, որ մեր ազատասեր ժողովուրդը կձեռնարկի վերջին և որոշիչ քայլը երկիրը զավթիչների կապանքներից ազատելու համար»,- հայտարարել է նախագահը:
Ըստ վրացական պետության ղեկավարի` երկիրը երբեք չպետք է վերադառնա դեպի անցյալ, իսկ վաղվա ընտրությունները ընտրություն են ազատության և անօրինականության միջև:
«Նախընտրական քարոզարշավը լարել է հասարակությանը, ուստի խնդրում եմ ընտրություն անելիս առաջնորդվել ոչ թե զգացմունքներով, այլ բանականությամբ: Որոշում կայացնելիս հիշեք, թե որտեղ էր մեր երկիրը 9 տարի առաջ, և որտեղ ենք մենք այսօր: Վաղվա օրը շատ կարևոր է մեր երկրի համար, ուստի տանը մի՛ մնացեք: Հոկտեմբերի 1-ը վերածենք այն պատմական օրվան, երբ վրաց ժողովուրդը ցույց կտա իր իմաստնությունը և նվիրվածությունը հայրենիքին: Վստահ եմ, որ վաղը երեկոյան մենք բոլորս հպարտ կլինենք»,- հայտարարել է Վրաստանի նախագահ Միխեիլ Սաակաշվիլին:
