Հունաստանի իշխանությունները հերքել են հրապարակումը, համաձայն որի` բանակի որոշ ուժեր դիտարկել են երկրում ռազմական հեղաշրջում իրականացնելու հնարավորությունը:
Հեղինակավոր «Վիմա» շաբաթաթերթը, որի վերջին համարը լույս է տեսել շաբաթ երեկոյան, հղում անելով զինվորականներին` գրել էր, որ անանուն դեմքերը հետաքրքրվել են առանձին սպաների կարծիքով` 2011-ի հոկտեմբերին կառավարության ռազմական հեղաշրջմանը նրանց մասնակցության հնարավորության մասին: Այդ ժամանակ երկրում կառավարական ճգնաժամ էր հասունանում, որի կենտրոնում այն ժամանակվա վարչապետ Յորգոս Պապանդրեուն էր: Այս մասին հայտնում է РИА Новости-ն:
Նախկին վարչապետը, Ազգային հետախուզության նախկին ղեկավարն ու պաշտպանության ներկայիս նախարարը հանդես են եկել հայտարարություններով` հերքելով շաբաթաթերթի տեղեկությունները:
«Հունական զինված ուժերը եղել են, կան և նվիրված կմնան իրենց պարտքին, որը սահմանում է Հունաստանի Սահմանադրությունը, այն է` ապահովել և ամրապնդել ազգային անկախությունը, ինքնիշխանությունն ու երկրի անձեռնմխելիությունը: Մնացած ոչինչ չի համապատասխանում նրանց գործունեությանը»,- հայտարարել է պաշտպանության նախարար Պանոս Պանայոտոպուլոսը:
Ազգային հետախուզության նախկին ղեկավար Կոնստանտինոս Բիկասը իր հերթին հայտարարություն է տարածել, որում հերքում է հոդվածի վկայություններն այն մասին, թե հետախուզությունը տեղյակ է եղել բանակի մի մասի կասկածելի տրամադրությունների մասին:
Հրապարակման մեջ նշվում է, որ լարվածությունն ի հայտ է եկել 2011-ի հոկտեմբերի 26-ին, երբ ԵՄ-ն ու ԱՄՀ-ն համաձայնեցին Հունաստանին տրամադրել հավելյալ վարկային օգնություն և աջակցել100 մլրդի հասնող պարտքի ներմանը` երկարամյա տնտեսական կոշտ միջոցառումների դիմաց:
Նախկին վարչապետ Պապանդրեուի սպասումները, թե համաձայնագիրը հայրենակիցների կողմից նորմալ կընդունվի, չարդարացան: Նա բախվեց բողոքի նոր ալիքների, իսկ հոկտեմբերի 28-ին` ազգային տոնի օրը, ցուցարարները Սալոնիկում ռազմական շքերթը խափանեցին սուլոցներով` ուղղված նախագահ Պապուլյասի դեմ:
