Այսօր՝ սեպտեմբերի 28-ին, Ոստիկանության քննչական գլխավոր վարչության հատկապես կարևորագույն գործերով քննության վարչությունից Երևանի Կենտրոն և Նորք-Մարաշ վարչական շրջանի ընդհանուր իրավասության դատարան բերվեցին ՀՀ սոցիալական ապահովության պետական ծառայության նախկին պետ Վազգեն Խաչիկյանը, նույն ծառայության վճարումների ծառայության նախկին պետ Հովհաննես Գրիգորյանը և Կենսաթոշակային ապահովագրության առանձին ծրագրերի վարչության պետ Աշոտ Աբրահամյանը:
Ֆոտոլրագրող Գագիկ Շամշյանը shamshyan.com-ին հայտնել է, որ քննչական մարմինը դիմել է նշված դատարան, որպեսզի այս երեք անձանց նկատմամբ, որպես խափանման միջոց, դատարանն ընտրի երկամսյա կալանքը:
Գ. Շամշյանը հայտնել է, որ Վ. Խաչիկյանին մեղադրանք է առաջադրվել ՀՀ քրօր-ի 178 հոդվածի 3-րդ մասի 1-ին կետի, 179 հոդվածի 3-րդ մասի 1-ին, 2-րդ կետերի և 314 հոդվածի հատկանիշներով:
Հովհանես Գրիգորյանին և Աշոտ Աբրահամյանին մեղադրանք է առաջադրվել ՀՀ քրօր-ի 179 հոդվածի 3-րդ մասի 1-ին, 2-րդ կետերի և 314 հոդվածի հատկանիշներով:
Գ.Շամշյանը հայտնել է, որ քիչ առաջ դատավոր Էդիկ Ավետիսյանը, վերադառնալով խորհրդակցական սենյակից, բավարարեց քննչական մարմնի միջնորդությունը և որպես խափանման միջոց՝ երկամսյա կալանք կիրառեց Վ. Խաչիկյանի նկատմամբ, ում ոստիկանության աշխատակիցները դատարանի հետնամասից տեղափոխեցին:
Այս պահին նշված դատարանի երրորդ դահլիճում դատավոր էդիկ Ավտեիսյանը շարունակում է դռնփակ դատական նիստը, որտեղ քննարկվում է մյուս կասկածյալների նկատմամբ ևս որպես խափանման միջոց երկամսյա կալանք կիրառելու միջնորդությունը:
