Այսօր ռուսական Коммерсант-ը հրապարակել է մի հոդված, որը կապված է Գելենջիկում իրականացվող սկանդալային շինարարական մի նախագծի հետ:
Հիշեցնենք, որ 2010թ. վերջին Պուտինի նախկինում մոտ կանգնած գործարարներից մեկը հանդես էր եկել բաց նամակով, որտեղ նշում էր, որ Գելենջիկում իրականացվում է մի հսկայական շինարարություն, որը պատկանում է վարչապետ Վլադիմիր Պուտինին:
Արևմտյան շատ լրատվամիջոցներում հայտնված այս տեղեկության համաձայն` կառուցվող շինությունը իրենից ներկայացնում է իսկական պալատ, որը նախատեսված է անձամբ Պուտինի համար, որի շինարարական աշխատանքներն ավարտելուց հետո կարժենա 1 մլդր դոլար:
Երեկ հայտնի է դարձել, որ Ռուսաստանում հայտնի գործարար Ալեքսանդր Պոնոմարենկոն գնել է վերոհիշյալ օբյեկտը 350 մլն դոլարով:
Սկանդալային տեղեկություններ հայտնած գործարար Սերգեյ Կոլեսնիկովը Коммерсант-ին կարծիք է հայտնել, որ Պոնոմարենկոյի կողմից այդ օբյեկտի վաճառքից հետո դժվար թե փոխվել է դրա իրական սեփականատերը, և որ այն շարունակելու է պատկանել Վլադիմիր Պուտինին:
Այն, որ օբյեկտը չի պատկանում Պուտինի, երեկ կրկին վերահաստատել է վարչապետի խոսնակ Դմիտրի Պեսկովը` նշելով, որ Պուտինը երբեք կապ չի ունեցել այդ շինարարության հետ ո՛չ այն ժամանակ, երբ նախագահ էր, ո՛չ էլ հիմա, երբ վարչապետ է:
Սակայն թերթը մի շատ հետաքրքիր փաստ է ներկայացնում, որը կարող է վկայել այն բանի մասին, որ Պուտինն ուղղակի ցանկանում է հրաժարվել այդ կիսակառույցից` խուսափելու համար հետագա բացասական զարգացումներից, սակայն դա չի ցանկանում անել ի վնաս իրեն և լրացուցիչ օգուտ է ուզում ստանալ:
Բանն այն է, որ Գելենջիկում գործող Penny Lane Sochi գլխավոր տնօրեն Սերգեյ Նիկիտինը զարմանք է արտահայտել, քանի որ 350 մլն դոլարը շատ մեծ գումար է այն օբյեկտի համար, որը գնել է Ալեքսանդր Պոնոմարենկոն: Գելենջիկը շատ հեռու է Սոչիի նման ժողովրդականություն վայելելու առումով:
Եթե իրոք Պոնոմարենկոն գնել է այն, ինչի մասին տեղեկություն է տարածվել, ապա այդ շինության համար նա պետք է վճարեր 12-14 մլն դոլար: Ինչ պատճառով է պոնոմարենկոն մի քանի տասնյակ անգամ ավել գումար վճարել, մնում է միայն գուշակել:
