Amnesty International իրավապաշտպան կազմակերպությունը ներկա փակուղուց դուրս գալու կոչով դիմել է Շվեդիային` կապված Ջուլիան Ասանժի արտահանձնման հետ: Կազմակերպությունը պահանջել է երաշխիքներ տրամադրել, որ Ասանժը չի արտահանձնվի ԱՄՆ-ին, եթե հանցաքննման համար լինի Շվեդիայում:
Կազմակերպությունը նշում է, որ ինքը վկայություն չունի, որ Ստոկհոլմը ծրագրում է Ասանժին արտահանձնել ամերիկյան կողմին, սակայն եթե նման «հարկադիր փոխանցում» տեղի ունենա, ապա Amnesty-ի կարծիքով` Wikileaks-ի հիմնադիրը կենթարկվի «մարդու իրավունքների լուրջ խախտումների իրական ռիսկի»:
Ներկայումս Ջուլիան Ասանժը գտնվում է Լոնդոնում` Էկվադորի դեսպանատանը: Էկվադորը նրան քաղաքական ապաստան է տրամադրել օգոստոսի կեսերին: Ասանժը չի կարողանում լքել դիվանագիտական առաքելության տարածքը, քանի որ բրիտանական ոստիկանությունը մտադիր է ձերբակալել նրան և արտահանձնել Շվեդիային, որտեղ նա պետք է ցուցմունք տա սեռական հանցագործությունների մեղադրանքներով: Ասանժն իր մեղքը հերքում է: Անցած շաբաթ Էկվադորը առաջարկել է Շվեդիային` Ասանժին Լոնդոնից տեղափոխել Ստոկհոլմ, որտեղ նա կշարունակի գտնվել Էկվադորի դիվանագիտական առաքելության հովանու ներքո:
