ՀՀ նախկին արտգործնախարար, ԲՀԿ կուսակցության անդամ Վարդան Օսկանյանի դեմ հարուցված քրգործը քաղաքական ենթատեքստ ունի: Այս մասին «Առաջին լրատվական»-ի հետ զրույցում ասաց «Ժառանգություն» կուսակցության գլխավոր քարտուղար Ստեփան Սաֆարյանը՝ անդրադառնալով Վարդան Օսկանյանի «Սիվիլիթասի» դեմ հարուցված քրգործի վերջին զարգացումներին:
Սաֆարյանը նշեց, որ գործի մանրամասներին լավ ծանոթ չէ, և տեղյակ չէ, թե կոնկրետ ինչ չարաշահումների մասին է խոսքը: «Քանի որ հիմա արդեն սկսվում է նախագահական ընտրություններին հայտերի ներկայացումը, ապա հնարավոր է, որ դատախազը հանդես գա Օսկանյանին մանդատից զրկելու պահանջով, որպեսզի այդ կերպ բացառվի վերջինիս առաջադրումը որպես թեկնածու»,- նման տեսակետ հայտնեց նախկին պատգամավորը:
Հիշեցնենք, որ ՀՀ վերաքննիչ դատարանը մերժեց ԲՀԿ պատգամավոր, նախկին արտգործնախարար Վարդան Օսկանյանի ներկայացուցիչ Տիգրան Աթանեսյանի բողոքն ընդդեմ Կենտրոն և Նորք-Մարաշ ընդհանուր իրավասության դատարանի որոշման: ՀՀ գլխավոր դատախազ Աղվան Հովսեփյանը այսօր միջնորդագիր է ներկայացրել Ազգային ժողով՝ պատգամավոր Վարդան Օսկանյանին քրեական գործում որպես մեղադրյալ ընդգրկելու և անձեռնմխելիությունից զրկելու համաձայնություն տալու մասին:
