Վաղ առավոտից տեղեկություններ էինք ստանում այն մասին, որ փակ են Արագածոտնի, Կոտայքի, Արարատի, ինչպես նաև մի շարք այլ մարզերի տարբեր քաղաքներից Երևան եկող ճանապարհները: Չեն աշխատել այդ մարզերից եկող երթուղայիններն ու միկրոավտոբուսները: Իսկ այն տաքսիները, որոնց մեջ երկուսից ավելի մարդ է եղել, հաճախ ճանապարհային ոստիկանների կողմից կանգնեցվել են և հետ ուղարկվել:
Արարատի մարզի Արարատ քաղաքում վաղ առավոտից մարդկանց բազմություն է հավաքվել, որոնք ցանկացել են հասնել մայրաքաղաք, իսկ ավտոկայանում հավաքված մոտ 40-50 մարդկանց դուրս են հանել տարածքից: «Առաջին լրատվականի» թղթակիցը փորձել է ավտոկայանի դիսպետչերից և վարորդներից տեղեկություններ ստանալ, սակայն վերջիններս հրաժարվել են` ասելով, թե իրենք հրահանգ են կատարում և չեն ուզում զրկվել աշխատանքից… Ուսանողները ևս չեն կարողացել հասնել մայրաքաղաք: Առավոտից Աշտարակից ևս որևէ երթուղային տաքսի Երևան չի ուղևորվել: Երթուղայինների կենտրոնակայանում նույնսիկ մարդ չի եղել… Մեզ տեղեկացրել են, որ հրահանգված է չներկայանալ աշխատանքի… Մեր թղթակցի հարցին` ինչո՞ւ չկան երթուղայիններ, տեղացիները պատասխանել են` այսօր հանրահավաք է, հանրահավաքի օրերին միշտ նույն պատմությունն է` Երևան տանող երթուղային տաքսիների, ավտոբուսների համար ազատ օր է. աշխատում են միայն տաքսիները: Փակ է եղել նաև Էջմիածնից Երևան եկող ճանապարհը:«Ժամանակ»-ը նաև պարզել է, որ 050 VV 05 պետհամարանիշով «Մերսեդես» մակնիշի մեքենան Էջմիածին-Երևան ճանապարհահատվածում կանգնեցրել է երթուղայիներից մեկը և ուղևորներին իջեցրել` պատճառաբանելով, թե վարորդը չունի տեխնիկական զննման փաստաթուղթ:
Կուտակումներ են եղել նաև Արմավիրի ավտոկայանում, չեն աշխատել երթուղային տաքսիները, ավտոբուսները… Մասնավոր տաքսիներին էլ խստագույնս զգուշացված են եղել` մարդկանց մայրաքաղաք չտեղափոխել` անկախ նրանից՝ ինչ նպատակով են գնում… «Ասել են, որ եթե տանենք, կզրկվենք ավտոկայանում կայանելու իրավունքից»,- մեզ հետ զրույցում ասել են մասնավոր տաքսիների վարորդները… Ոստիկանները փակել են նաև Աբովյան-Երևան ճանապարհը:
Ականատեսները Լոռվա մարզից մեր խմբագրությանը ահազանգել են այն մասին, որ Վանաձոր-Երևան ավտոմայրուղում այսօր նկատվել է զինվորական մեքենաների տեղաշարժ, այդ թվում` ծանր զրահատեխնիկայի` տանկերի: Մի քանի զինվորական մեքենաներից և զրահամեքենաներից կազմված շարասյունը շարժվելիս է եղել դեպի Երևան: Մեզ չի հաջողվել ճշտել, թե որքանով կապ ունեն այդ տեղաշարժերը Երևանում կայանալիք հանրահավաքի հետ: Սակայն հիշեցնենք, որ 2008թ. մարտի 1-ի հայտնի դեպքերից առաջ էլ այդ կողմից ծանր տեխնիկայի տեղաշարժ էր արձանագրվել: Գյումրիից և Սյունիքի մարզից Երևան եկող ճանապարհները օրվա երկրորդ կեսին բաց էին: Սակայն ինչպես մեզ տեղեկացրել են Գյումրիից, Գյումրիի օդանավակայանի մոտ գտնվող խաչմերուկում ոստիկանությունը հսկողություն է իրականացրել և ստուգել քաղաքից դուրս եկող բոլոր մեքենաները: Ընդդիմության ներկայացուցիչների և լրագրողների ժամանումից հետո են միայն ոստիկանները հեռացել խաչմերուկից և դադարեցրել իրենց գործունեությունը: Ինչ վերաբերում է սյունեցիներին, ապա թեև Սյունիքի ողջ տարածքով անցնող Մեղրի-Երևան միջպետական ճանապարհը բաց էր, սակայն ոստիկանները արդեն Վայոց ձորի մարզից պարբերաբար կանգնեցրել, ստուգել են վարորդների փաստաթղթերը…
Իշխանությունները չեն բավարարվել միայն մարզերից եկող ճանապարհները փակելով: Երեկ ամբողջ օրը մենք տեղեկություններ էինք ստանում, որ ոստիկանությունը զինված է դուրս եկել Երևանի կենտրոն` նախապատրաստվելով ՀԱԿ-ի կողմից հրահվիրված հանրահավաքին:
Պարզվել է, որ այս հնարքը կիրառում են ՊՊԾ ծառայության աշխատակիցները և հատկապես «կարմիրբերետավորները»: Ռոբերտ Մելքոնյանի` «Բազազի» ենթակայության տակ գտնվող այս ստորաբաժանումները այս քայլով փորձել են հետ պահել մարդկանց հանրահավաքին մասնակցելուց:
Բացի այդ` Երևանի դպրոցներում երեկ հայտարարվել է, որ ժամը16-30-ին, ծնողական ժողով է լինելու, որպեսզի դրանով խոչընդոտեն մարդկանց մասնակցել հանրահավաքին: Տնօրինությունները ուսուցիչներին ևս պարտադրել են ներկա գտնվել այդ ժողովներին: Իսկ Վ.Բրյուսովի անվան լեզվաբանական համալսարանի երկրորդ հերթի դասերը տապալվել են, քանի որ շրջաններում ապրող ուսանողների մեծամասնությունը փակ ճանապարհների պատճառով չի կարողացել գալ դասի:
«Առաջին լրատվականին» տված հարցազրույցում համալսարանի դասախոսներից մեկը, ով չցանկացավ ներկայանալ, նշեց, որ այժմ ներքին գործերից և Ճանապարհային ոստիկանությունից ճշտում են` արդյոք ճանապարհները փակ են, թե ոչ: «Եթե մեզ այդ մասին տեղեկացնեն, ապա ուսանողների բացակաները և զրո միավորները կհամարվեն հարգելի»,- ասել է նա: Սակայն Համալսարանի աշխատակազմի ղեկավար Նելսոն Ներսիսյանը ոչ մի կերպ չի ընդունել դասերի տապալման փաստը: Նա հերքել է նաև հրապարակված այն տեղեկությունը, թե շհամալսարանում դաս չի լինելու: «Դա հերյուրանք է, նպատակ ունեն վարկաբեկելու համալսարանի բարի համբավը և հեղինակության վրա ցեխ շպրտելու: Մենք քաղաքի դատախազին էլ գրել ենք, որ դա սադրանք է, և խնդրում ենք մեղավոր անձանց պատասխանատվության ենթարկել և հերքում տպագրել»,- ասել է Ն.Ներսիսյանը:
«Ժամանակ» օրաթերթ