Ինտերնետում հայտնվել են հրապարակումներ, ուր մի խումբ ակտիվիստներ կոչ են անում պաղեստինցիներին մարտի 15-ին դուրս գալ զանգվածային բողոքի ակցիաների Գազայում և Արևմտյան ափին:
Ավելի վաղ նմանատիպ միջոցառումներ տեղի են ունեցել, սակայն դրանք աչքի էին ընկնում սակավամարդությամբ և դրանց հանդեպ ժողովրդի անտարբերությամբ:
Կազմակերպիչները խոստանում են մարտի 15-ին կազմակերպել աննախադեպ միջոցառում, սակայն առայժմ հայտնի չէ, թե ում դեմ է ուղղված «Facebook-ի պաղեստինյան հեղափոխությունը» և ինչ կոչերով կընթանան բողոքի ակցիաները:
Միանգամայն հնարավոր է, որ եթե բողոքի ցույցերը հակաիսրայելական կոչերով էլ չսկսեն, պաղեստինյան ղեկավարությունը և՛ Ռամալայում, և՛ Գազայում կշտապի հակաիսրայելական կոչերը փաթաթել նոր շարժման վզին:
Հրեական պետության դեմ պայքարի նոր փուլ սկսելու համար ավելի լավ սկիզբ, քան Արևմուտքում մեծ ժողովրդականություն վայելող «արաբական հեղափոխությունները», հնարավոր չէ մտածել: