1978թ. այս օրը վախճանվեց հայ խորհրդային թատրոնի և կինոյի դերասան, ԽՍՀՄ ժողովրդական արտիստ (1967), ԽՍՀՄ պետական մրցանակակիր (1952) Գուրգեն Ջանիբեկյանը (Տեր–Խաչատրյան):
Ծնվել է 1897թ. մայիսի 18-ին, 1917թ. ավարտել է Երևանի ուսուցչական ռուսական սեմինարիան, 20 տարեկանից ելույթներ է ունեցել սիրողական թատերախմբերում, մասնակցել Մկրտիչ և Սյուզան Գարագաշների օպերետային, Զարիֆյան-Աբելյան խմբերի ներկայացումներին: Խաղացել է Ամո Խարազյանի շրջիկ թատրոնում, Արմեն Արմենյանի թատերախմբում, Թիֆլիսի Հայ դրամայի թատրոնում:
1924-ից Երևանի Առաջին պետթատրոնի, այժմ՝ Սունդուկյանի անվան ազգային-ակադեմիական թատրոն դերասան էր (1965–1967թթ.՝ նաև տնօրեն): 1940–1949թթ. եղել է Հայկական թատերական ընկերության առաջին նախագահը: 1947–1949թթ. դասավանդել է Երևանի թատերական ինստիտուտում:
Ջանիբեկյանը Գրիգոր աղայի կերպարի (Վրթանես Փափազյանի «Ժայռ») լավագույն մարմնավորողն էր խորհրդահայ բեմում. այդ դերակատարումն իր կատարելությամբ մտել է հայ թատրոնի պատմության գոհարների շարքը: Կատակերգական դերերում Ջանիբեկյանը հակվել է երգիծանքի սուր, հաճախ՝ գրոտեսկային շեշտադրումների: Ջանիբեկյանը ռադիո և հեռուստաբեմադրություններում խաղացել է շուրջ 100 դեր: Նրա անունով Երևանում կոչվել է փողոց:
