Անցյալ շաբաթավերջին «Զվարթնոց» օդանավակայանը դարձյալ դադարեցրեց ազգային ավիափոխադրող «Արմավիա» ավիաընկերության չվերթների սպասարկումը՝ պատճառաբանալով, թե ընկերությունը չի մարել կուտակած պարտքերը:
«Առաջին լրատվական»-ի ունեցած տեղեկություններով, սակայն, խնդիրն ամենևին էլ կապված չէ պարտքերի հետ: Մեր տեղեկություններով՝ «Արմավիա»-ն սեպտեմբերի 1-ի դրությամբ մարել է պարտքը, անգամ «Զվարթնոց» օդանավակայանը տոնական օրերին կատարվելիք չվերթների համար կանխավճար է պահանջել: «Արմավիա»-ն, ըստ նախապես ձեռք բերված պայմանագրային պարտավորության, կանխավճարը չի վճարել, քանի որ ընկերոթյունը վճարումները կատարում է չվերթի իրականացումից հետո: Կանխավճարը չտալու դեպքում անգամ «Զվարթնոց» օդանավակայանը թույլատրել է, որ «Արմավիա»-ն չվերթներ իրականացնի:
Մեր ունեցած տեղեկություններով՝ արգենտինահայ գործարար Էդուարդո Էռնեկյանին պատկանող «Արմենիա միջազգային օդանավակայաններ» ընկերությունը, որի համասեփականատերն է նաև երկրորդ նախագահ Ռոբերտ Քոչարյանի ընտանիքը, մտադիր է ձեռք բերել ազգային ավիափոխադրող «Արմավիա» ավիաընկերությունը: Հետևաբար վերջին շրջանում հաճախակի դարձած քաշքշուկների նպատակը մեկն է՝ ստիպել ընկերության սեփականատիրոջը վաճառել այն:
Ի դեպ, «Արմավիա» ավիաընկերությունից չեն հերքել, որ ընկերության սեփականատեր Միխայիլ Բաղդասարովը մտադիր է վաճառել «Արմավիա»-ն:
Լուր իսկությունը ճշտելու նպատակով «Առաջին լրատվական»-ը դիմեց «Արմենիա» միջազգային օդանավակայններ ՓԲԸ-ին: Օդանավակայանի հանրային կապերի բաժնից «Առաջին լրատվական»-ին պարզաբանեցին, որ «Արմենիա Միջազգային Օդանավակայաններ» ՓԲԸ-ն երբևէ «Արմավիա» ավիաընկերությունից կանխավճար չի պահանջել:
Նաև հստակեցրեցին, որ «Արմենիա Միջազգային Օդանավակայաններ» ՓԲԸ նախագահ Էդուարդո Էռնեկյանը երբևէ մտադիր չի եղել ձեռք բերել «Արմավիա» ավիաընկերությունը, ավելին`ՀՀ նախկին նախագահ Ռոբերտ Քոչարյանը և նրա ընտանիքը նույնպես երբևէ «Արմենիա Միջազգային Օդանավակայաններ» ՓԲԸ համասեփականատեր չեն եղել:
