Սերմի դանիացի դոնորը, հայտնի որպես «դոնոր 7042», հայտնվել է աղմկահարույց պատմության կենտրոնում: Տղամարդը գենետիկ բարդ հիվանդություն ունի, որը թեստերը չեն բացահայտել, և տղամարդն այն փոխանցել է երեխաներին,- գրում է The Telegraph-ը:
Դոնորի սերմի հաշվին, ընդհանուր առմամբ, 43 երեխա է ծնվել՝ չնայած կանոնների համաձայն, երեխաների թիվն առավելագույնը պետք է 25 լինի:
Հայտնի է, որ դոնորը սերմը հանձնել է Կոպենհագենի Nordisk Cryobank կլինիկային: Բանկի կողմից նյութն ընդունելուց հետո պարզվել է, որ տղամարդու մոտ առկա է նեյրոֆիբրոմատոզի առաջին տեսակը: Գենետիկ այս հիվանդությունը նպաստում է ուռուցքների առաջացմանը, այդ թվում՝ նյարդերի շուրջ ուռուցքներին և ոսկորների դեֆորմացիային:
Հատկանշական է, որ դեռ 2009 թվականի հունիսին սերմի բանկին հայտնել էին, որ դոնորի տված սերմից հիվանդ երեխա է ծնվել: Սակայն այն ժամանակ ոչ մի միջոց չէր ձեռնարկվել: Նշենք նաև, որ 43 երեխաներից 18-ն ապրում են Նորվեգիայում և Շվեդիայում:
Ի դեպ, հաջորդ շաբաթվանից Դանիայում կսկսեն գործել նոր կանոններ, որոնք թույլ կտան մեկ դոնորից լույս աշխարհ գալ առավելագույնը 12 երեխայի: Եթե դոնորի մոտ շեղումներ նկատվեն, միանգամից կհրաժարվեն նրա մատուցած ծառայություններից:
