Грузия Online-ի փոխանցմամբ՝ Վրաստանի գլխավոր դատախազությունը երեկ նյութեր ու տեսանյութեր է հրապարակել այն մասին, որ Վրաստանի իշխանություններին անխնա քննադատող նախկին նախարար Գեորգի Խաինդրավան Ֆրանսիայում հանդիպել է վրացի «օրենքով գողերի» հետ:
Դատախազության հաղորդմամբ՝ այդ տվյալներն իրենք ստացել են ֆրանսիական ժանդարմերիայից, որից հետո Խաինդրավան կանչվել է հարցաքննության: Դատախազությունում հարցաքննվելուց հետո Խաինդրավան հայտարարել է, որ դատախազությանը հետաքրքրել են իր կապերը «օրենքով գող» Ռևազ Լորտկիպանիձեի հետ, որը իր մանկության ընկերն է, և ինքը երբեք չի թաքցրել դա: Նա հավելել է, որ Լորտկիպանիձեն եղել է, կա և կլինի իր ընկերը:
Խաինդրավան հաստատել է նաև այն, որ նախորդ տարվա նոյեմբերին եղել է Ֆրանսիայում և հանդիպել Լորտկիպանիձեի հետ: Դատախազությունը հայտարարել է, որ քրեական հեղինակությունները Ֆրանսիայում պլանավորել են առաջացնել ապակայունացում՝ խորհրդարանական ընտրությունների շեմին անկարգություններ հրահրելով: Ֆրանսիական կողմի հանձնած տեղեկատվությունը վկայում է քրեական աշխարհի և վրացի ընդդիմադիրի միջև առկա կապի մասին:
