Ադրբեջանական Turan լրատվական գործակալության փոխանցմամբ՝ 2012 թվականին ադրբեջանական աղբյուրները դադարեցրին տվյալներ հրապարակել Ադրբեջանի պետական նավթային ընկերության (SOCAR) կողմից Ռուսաստանին գազ մատակարարելու մասին: Հետաքրքրիր է, որ ռուսական «Գազպրոմը» նույնպես սկսել է վարվել նման կերպ՝ թեև նախորդ տարիներին յուրաքանչյուր եռամսյակի կտրվածքով տվյալներ էր ներկայացնում Ադրբեջանից ներկրած գազի մասին:
Այդ տեղեկատվության չհրապարակման պատճառը բավական պարզ է. «Գազպրոմը» չի կատարում իր պայմանագրային պարտավորությունները՝ SOCAR-ից տարեկան 3 միլիարդ խորանարդ մետր գազի գնումը: Ռուսական աղբյուրներից հաջողվել է որոշակի տվյալներ հայթայթել այս տարի Ադրբեջանից Ռուսաստանի ներկրած գազի ծավալի մասին:
2012 թվականի հունվար-փետրվարին Ռուսաստանն Ադրբեջանից ներկրել է 211 միլիոն խորանարդ մետր գազ, իսկ մարտին՝ ընդամենը 70 միլիոն խորանարդ մետր գազ: Մատակարարման այդ անկումը պատճառաբանվել էր «Հաջիգաբուլ-Մոզդոկ» խողովակաշարի երկշաբաթյա վերանորոգմամբ: Ապրիլին գազի մատակարարումը կազմել է 150 միլիոն խորանարդ մետր, իսկ մայիսին այն նվազել է մինչև 135 միլիոն խորանարդ մետր:
Ողջ ամառվա ընթացքում «Գազպրոմը» ներկրել է ընդամենը 550 միլիոն խորանարդ մետր ադրբեջանական գազ: Այսինքն՝ այս տարի «Գազպրոմը» ներկրել է 1 միլիարդ խորանարդ մետրից քիչ ավելի ադրբեջանական գազ (մինչդեռ պարտավորվել է տարեկան ներկրել 3 միլիարդ խորանարդ մետր):
Այս ամենի հետ մեկտեղ նվազում է «Բաքու-Նովոռոսիյսկ» նավթամուղով ադրբեջանական նավթի մատակարարման ծավալը, ինչի պատճառն այն է, որ SOCAR-ը նվազեցնում է նավթի արդյունահանումը: Մինչդեռ գազի պարագայում հակառակն է. Ադրբեջանն արդեն երկրորդ տարին անընդմեջ ստիպված է նվազեցնել գազի արդյունահանումը, քանի որ ո՛չ հարևան երկրներում, ո՛չ էլ տարածաշրջանում չկան գնորդներ:
