Որ Ռուսաստանի իշխանությունները Հայաստանը արդեն ոչ թե անկախ պետություն են ընկալում, այլ ընկալում են որպես սեփական ծայրագավառ, նորություն չէ:
Հայաստանի իշխանությունների վերջին տարիներին վարած տնտեսական և արտաքին քաղաքականության հետևանքով Հայաստանը ռուսիֆիկացել և ռուսաֆիկացվում է անխնա:
Վերջին երկու-երեք տարիների ընթացքում հերթը հասել է մշակութային ճորտությանը, երբ Հայաստանում արդեն ռուսերենը դարձնում են կրթության լեզու, հռչակում են ազգային անվտանգության լեզու: Սակայն պարզվում է, որ սա ոչ միայն վերջը չէ, այլ նույնիսկ սկիզբն է երևի թե:
Բանն այն է, որ Ռուսաստանում արդեն կազակներն են Հայաստանը սկսել որպես ինչ-որ ռուսական գավառ ընկալել և ցանկություն են հայտնել Հայաստանում Դեսպանական ստանիցա հիմնելու մասին:
Այսօր հայտնի է դարձել, որ ռուսաստանյան միջտարածաշրջանային «Կենտրոնական կազակական զորք» զորական կազմակերպությունը դիմել է ՀՀ արդարադատության նախարարություն` Հայաստանի տարածքում Դեսպանական ստանիցա (ներկայացուցչություն) գրանցելու խնդրանքով:
Այսինքն` մնացել էր, որ Հայաստանը հայտնվեր նաև կազակական էքսպանսիայի ալիքի տակ: Եվ կասկած չկա, որ Հայաստանի արդարադատության նախարարությունը հավանություն կտա Դեսպանական ստանիցա հիմնելու «խնդրանքին», որովհետև Հայաստանում Ռուսաստանից եկող որևէ մակարդակի «խնդրանք» մերժելը համարվում է ոչ միայն անկրթություն, այլ նաև քաղաքական անհեռատեսություն և անգրագիտություն, քանի որ այդ «խնդրանքների» բավարարումն է դարձել Հայաստանի իշխանական համակարգի անվտանգության գրավականը:
Այնպես որ կասկած չկա, որ առաջիկայում Հայաստանում իրենց ոտքը կպնդացնեն նաև կազակները:
Իսկ սա նշանակում է, որ եթե Հայաստանում քաղաքացիական իրավունքի համար պայքարի ելած հասարակությանը ճնշելու համար Հայաստանի իշխանությունները դիմում էին ռուսական հատուկջոկատայինների օգնությանը, ապա դրանից հետո արդեն Հայաստանի քաղաքացիների դեմ նրանք կհանեն կազակներին էլ:
Կարծում ենք, որ ոչ մեկի համար արդեն գաղտնիք չէ, որ Հայաստանի իշխանությունների մտածելակերպով Հայաստանում բոլորը տեղ ունեն` իրենց իրավունքը պաշտպանող Հայաստանի քաղաքացիներից բացի:
Իսկ կոնկրետ կազակների պարագայում իրավիճակը պարզապես կրկնակի վտանգավոր է, նկատի ունենալով այն հանգամանքը, որ կազակները ըստ էության ռուսական մեծապետականության` շովինիզմի և ազգայնականության կրողներն են, ընդ որում ագրեսիվ կրողները, և նկատի ունենալով ռուսական շովինիզիմի և ազգայնականության «բարի» ավանդույթները, կարելի է պատկերացնել, թե Հայաստանի ազգային անվտանգության տեսակետից ինչ մեծ սպառնալիք է դառնում Հայաստանում նրանց ստանիցայի հիմնադրումը:
