Կիրովում սկանդալ է հասունանում BMW մակնիշի ավտոմեքենայի երիտասարդ հայ վարորդի շուրջ, որն իր փոխադրամիջոցի և մի քանի այլ մեքենաների հետ միասին դարձել է խոշոր ճանապարհատրանսպորտաին պատահարի մասնակից: Վթարի հետևանքով զոհվել է 3 մարդ, տուժել՝ 7-ը: Տեղի բնակիչների և լրագրողների փոխանցմամբ՝ աչքի զարնող համարներով BMW X5-ին մեկ անգամ չէ, որ բռնել են ճանապարհային երթևեկության կանոնների խախտման համար, սակայն իրավապահների ուշադրությունը նրա վրա սևեռվել է միայն ողբերգական ելքով միջադեպից հետո:
Նախնական վարկածով՝ վարորդը մեղավոր չէ:
Վթարը տեղի է ունեցել սեպտեմբերի 22-ին, Կիրովի կենտրոնական՝ Կառլ Մարքսի փողոցում: Ճանապարհատրանսպորտային պատահարի մասնակից են դարձել ВАЗ-21110, ВАЗ-21093, Opel Corsa և BMW X5 մակնիշի մեքենաները: Վերջինս դուրս է եկել հանդիպակաց ուղի և վթարի պատճառ հանդիսացել:
Վթարից 3 օր անց, ՆԳՆ Կիրովի վարչությունը հաղորդել է փաստի առթիվ քրեական գործի հարուցման մասին: Ոստիկանությունում նշել են, որ վթարի հավանական մեղավորը ВАЗ-21110-ի զոհված վարորդն է, քանի որ նրանց բախման առավել հավանական վայրը գտնվել է BMW-ի երթևեկության գոտում:
Հետաքրքիր է, որ կիրովցի ավտոմոբիլիստները չեն հավատում ВАЗ-21110-ի վարորդի մեղավորությանը: Նրա մեքենան, ինչպես նաև նրա հետևից ընթացող ВАЗ-21093-ը, հարվածից զրկվել են թափքի առաջնային հատվածից: Եվ չնայած ոստիկանությունը չի հրապարակում В333МХ 43 պետհամարնիշերով BMW X5-ի վարորդի ինքնությունը, սակայն քաղաքացիները կռահել են, թե նա ով է:
Ինտերնետ օգտատերերը հայտնել են, որ սպիտակ BMW X5-ը բազմիցս խախտել է ճանապարհային երթևեկության կանոնները: Նրանց խոսքով՝ ղեկին եղել է 23-ամյա Էդիկ Իգնատյանը՝ «Բարս» ՍՊ շինարարական ընկերության գլխավոր տնօրենի որդին: Վարորդին անձամբ ճանաչողները հավաստում են, որ հայրը մշտապես վճարել է որդու խախտումների համար ներկայացված տուգանքները, որոնք, ի դեպ, փոքր չեն եղել:
«Ես անձամբ ծանոթ եմ Էդիկին: Դժբախտությունն այն է, որ հայրը նրան երբեք ոչ մի հարցում չի մերժել, և այն, որ նման դեպք է տեղի ունեցել, մասամբ հայրիկի մեղավորությունն է: Նա վճարում էր տուգանքները, գիտեր, որ որդին խելագարի պես վազանց է կատարում: Էդիկը պարբերաբար փոխել է ավտոմեքենաները»,- տեղի բնակչի խոսքերն է մեջբերում Город Киров-ը:
BMW-ի վարորդն ու նրա հարազատները դեռևս մեկնաբանությամբ հանդես չեն եկել: Вконтакте-ի իր էջը Էդիկը ջնջել է:
