Ո՞րն է եղել անցած տարի Ազգային անվտանգության խորհրդի հիմնական արդյունքը, որ հասարակությունը կարող է նկատել: Այս հարցն այսօր ԱԺ պետա-իրավական և ֆինանսավարկային ու բյուջետային հանձնաժողովների համատեղ նիստի ընթացքում՝ 2011 թ. բյուջեի կատարակողականի ներկայացման ժամանակ, ՀՅԴ պատգամավոր Արծվիկ Մինասյանն ուղղեց ԱԱԽ աշխատակազմի ղեկավար Արտաշես Ավոյանին՝ հետաքրքրվելով նաև, թե այդ ինչ վերլուծություններ են, որոնք բոլորը 10 գնահատականի են արժանացել:
Ա. Ավոյանը պատասխանեց, որ ԱԱԽ-ն համակարգում է 6 միջգերատեսչական հանձնաժողովների, այդ թվում՝ Եվրոպական կառույցների հետ համագործակցության հանձնաժողովի, ՀՀ-ՆԱՏՕ և ՀՀ-ՀԱՊԿ գործակցությունը համակարգող հնանձնաժողովների աշխատանքը, որոնց համար պլանավորված են եղել այցեր ՀԱՊԿ անդամ պետություններ և մասնակցություն տարբեր հանձնաժողովների աշխատանքներին։ Իսկ բարձր գնահատականի են արժանացել տեղեկատվական անվտանգության և ռազմավարական վերլուծությունների վարչության վերլուծությունները, որոնք ներկայացվում են ՀՀ նախագահին:
