Ադրբեջանական Trend լրատվական գործակալության փոխանցմամբ՝ Ադրբեջանում ԵՄ-ի ներկայացուցչության ղեկավար Ռոլանդ Կոբիան լրագրողների հետ զրույցում անդրադարձել է «Անդրկասպյան» գազատարի կառուցման խնդրին.
«ԵՄ-ը կարծում է, որ «Անդրկասպյան» գազատարի կառուցումը բխում է Թուրքմենստանի և Ադրբեջանի շահերից: ԵՄ-ը նախկինի նման Թուրքմենստանի և Ադրբեջանի հետ քննարկում է «Անդրկասպյան» գազատարի կառուցման հարցը: Բանակցային վերջին փուլը տեղի ունեցավ սեպտեմբերին Աշխաբադում, և մենք պատրաստ ենք շարունակել բանակցությունները:
Մենք հավատում ենք, որ նախագծի իրագործումը համապատասխանում է Թուրքմենստանի և Ադրբեջանի շահերին: ԵՄ-ը չի կարծում, որ Կասպից ծովի չլուծված կարգավիճակը խոչընդոտ է հանդիսանում նախագծի իրագործման համար: Գոյություն չունի որևէ իրավական հիմք, որ Կասպից ծովի կարգավիճակը ազդի գազատարի նախագծի իրագործման վրա: Գազատարի կառուցման հարցը պետք է վերաբերի միայն Աշխաբադին ու Բաքվին և չպետք է վերաբերի Կասպից ծովի մյուս երկրներին»:
Հիշեցնենք, որ «Անդրկասպյան» գազատարն ունենալու է 300 կիլոմետր երկարություն և թուրքմենական գազը Կասպից ծովի հատակով հասցնելու է Ադրբեջան:
