Հաջորդ տարվա կեսերին շահագործման կհանձնվի Արմավիրի քրեակատարողական հիմնարկի 400 տեղանոց մեկ կորպուսը. այսօր ԱԺ-ում պետաիրավական հարցերի և ֆինանսավարկային ու բյուջետային հանձնաժողովների մշտական հանձնաժողովների համատեղ նիստում «2011թ. պետական բյուջեի կատարման մասին» տարեկան հաշվետվության ցուցանիշների ներկայացման ժամանակ հայտնեց արդարադատության նախարար Հրայր Թովմասյանը:
ՀՅԴ պատգամավոր Արծվիկ Մինասյանը հարցին՝ ՔԿՀ-ներում պահվող կալանավորների վերաբերյալ ի՞նչ տվյալներ կան, ի՞նչ է հաջողվել իրականացնել բարեփոխումների ծրագրից, Հ. Թովմասյանը պատասխանեց, որ զբաղվածությունը 20-30%-ով մեծացել է, ՔԿՀ-ներում նվազել է մահացության թիվը, անցած տարի չեն եղել սպանության և փախուստի դեպքեր: ՔԿՀ ենթակառուցվածքների դեռ 2009 թ. զարգացման ծրագրով 142 մլրդ դրամ է հատկացվում բոլոր 12 ՔԿՀ-ների արդիականացմանը: Դրա շրջանակներում վերակառուցվել է «Նուբարաշեն» ՔԿՀ-ի բուժմասը, ձեռք են բերվել սարքավորումներ, և, ըստ նախարարի, նաև դրանով է պայմանավորված մահացության թվի նվազումը:
Թովմայանը նաև նշեց, որ բարելավվել են «Աջակցություն դատապարտյալներին» հիմնադրամի աշխատանքները: Ոչ բյուջետային միջոցներով հնարավոր է հաջորդ տարի սկսվեն «Գորիսի» ՔԿՀ-ի շինարարության աշխատանքները, դրա շուրջ արդեն նախնական համաձայնություներ կան:
Նրա բնորոշմամբ՝ «Արթիկ», «Վանաձոր» և «Հրազդան» ՔԿՀ-ները առավել բարվոք վիճակում են, իսկ առավել անբարվոքը «Նուբարաշենն» է, որտեղ խնդիր կա նաև սահող հողերի հետ կապված:
Նախարաը նշեց, որ ՔԿՀ աշխատակիցների աշխատավարձերի բարձրացում չի նախատեսվում:
Թովմասյանի խոսքով` անցած տարի 10 մլն դրամ է հատկացվել ՄԻԵԴ-ի որոշումների կատարման համար:
«Ժառանգություն» խմբակցության պատգամավոր Զարուհի Փոստանջյանը հայտարարեց, որ Նռնաձոր համայնքի մոտ գտնվող «Մեղրի» ՔԿՀ-ին պատկանող մի քանի հեկտար դաշտերը չեն օգտագործվում, կալանավորները ոչ թե այդտեղ են աշխատում, այլ ազատագրված տարածքներում սովետական տարիներին հիմնված այգիներից նուռ ու թուզ են հավաքում: Զ. Փոստանջյանը հայտնեց, որ նռնաձորցիները պահանջում են համայնքին վերադարձնել հողերը:
Սրան ի պատասխան՝ Թովմասյանը հայտարարեց, որ ՔԿՀ կալանավորները աշխատում են հենց այդ հողատարածքներում, և զգալի բերք է սպասվում այս տարի:
Սակայն Փոստանջյանը հակադարձեց` այդ հողերում աշխատանք չի տարվում, և դրանք պարապուրդի են մատնված:
ԱԺ պետաիրավական հարցերի մշտական հանձնաժողովի նախագահ Դավիթ Հարությունյանն էլ նախարարին ու պատգամավորին առաջարկեց միասին այցելել նշված տարածք:
