Հայաստանի արդյունաբերողների և գործարարների (գործատուների) միությունը նախագահության նիստում որոշել է աջակցել սիրիահայ գործարարներին, որոնք Սիրիայում ներկա իրավիճակի պատճառով պարտադրված են եղել լքել իրենց տունը: ՀԱԳՄ գործարարները որոշել են սիրիահայերին տրամադրել աշխատատեղ կամ հնարավորության դեպքում ստեղծել նոր աշխատատեղեր սիրիահայերի համար, տրամադրել խորհրդատվություն, միության կապերն ու մյուս լծակները օգտագործելով՝ աջակցել սիրիահայ գործարարներին Հայաստանում բիզնես հիմնելու, նրանց գործող բիզնեսը արտերկրից Հայաստան տեղափոխելու գործում, աջակցել միության անդամ ընկերություններում ներդրումներ կատարել ցանկացողներին, նպաստել նրանց ինտեգրմանը Հայաստանի գործարար և բարոյահոգեբանական մթնոլորտին, կազմակերպել մասնագիտական սեմինարներ կամ վերաորակավորման ուսուցման դասընթացներ սկսնակ գործարարների համար, գործարարությամբ զբաղվողներին ծանոթացնել Հայաստանի տնտեսական օրենսդրությանը, փոփոխություններին՝ նոր իրավիճակներում արագ և ճիշտ կողմնորոշվելու համար, անհրաժեշտության դեպքում հնարավորության սահմաններում աջակցել սիրիահայ ուսանողներին կրթաթոշակների վճարման գործում։
ՀԳԱՄ-ից «Առաջին լրատվական»-ին հայտնեցին, որ միությունում ստեղծվել է աշխատանքային խումբ, համակարգվում են բոլոր տեղեկությունները և առաջարկությունները՝ սիրիահայերի խնդիրները լուծելու համար։ Աշխատանքային խումբը համագործակցելու է սփյուռքի և արտաքին գործերի նախարարությունների և խնդրին առնչվող պետական ու հասարակական տարբեր կառույցների հետ։
