Աթենքի կենտրոնում հակաամերիկյան քայլերթ է անցկացվել: Հավաքված ցուցարարները բողոքել են համացանցում սկանդալային «Մուսուլմանների անմեղությունը» ֆիլմի հայտնվելու դեմ: Այսպիսի ակցիա երկրում տեղի է ունեցել առաջին անգամ,- փոխանցում է Reuters-ը:
Ոստիկանության տվյալներով` ցույցի է դուրս եկել մի քանի հարյուր մարդ: Նրանք բացականչել են. «Այն ամենը, ինչ մենք ունենք, Մուհամմեդն է»: Նրանք կոչ են արել անմիջապես պատժել մարգարեին վիրավորողներին: Նախատեսվել էր, որ ցուցարարների նպատակակետը ԱՄՆ-ի դեսպանատունը պիտի լիներ, սակայն ոստիկանությունը փակել է մետրոյի բոլոր կայարաններն ու դիվանագիտական շենք տանող բոլոր ճանապարհները: Դեսպանատան շենքը վերցվել է ուժեղ հսկողության տակ: Օրինապահ մարմինների տեղեկությամբ` ցույցն ընդհանուր առմամբ անցել է առանց բախումների, ոչ ոք չի տուժել:
Հիշեցնենք, որ ԱՄՆ-ում նկարահանված «Մուսուլմանների անմեղությունը» ֆիլմը լուրջ դժգոհություն է հարուցել իսլամական աշխարհում: Հավատացյալների կարծիքով` ֆիլմը խեղաթյուրում է Իսլամի մասին պատկերացումները և ծայրահեղ վիրավորական է այս կրոնի բոլոր հետևորդների համար: Համացանցում ֆիլմի հայտնվելն արժեցել է Լիբիայում ԱՄՆ-ի դեսպանի, ինչպես նաև դեսպանատան երեք աշխատակիցների կյանքը: Անկարգությունները ճնշելու ընթացքում Աֆրիկայի և Մերձավոր Արևելքի երկրներում ԱՄՆ-ի դեսպանատների մոտ տուժել է ավելի քան 100 մարդ:
