Տավուշի մարզի Բերդ քաղաքում համայնքի ղեկավարի ընտրություններն այսօր անցնում են նորմալ, հանգիստ մթնոլորտում, միջադեպեր դեռ չեն արձանագրվել: Այս մասին «Առաջին լրատվական»-ի հետ զրույցում հավաստեց գործող քաղաքապետ, քաղաքապետի ՀՀԿ-ական թեկնածու Անդրանիկ Շառոյանը: Նրա խոսքով, ընդհանուր 7,500 ընտրողներից այս պահին քվեարկել է մոտ 4,000-ը: Սպասվում է, որ մինչև ընտրատեղամասերի փակվելը իրենց քաղաքացիական պարտքը կատարողների թիվը կհասնի 4,300-ի:
Միաժամանակ, Ա. Շառոյանը հայտնեց, որ լսել է, որ ընտրողներին օգնում են ու ավտոմեքենաներով հասցնում ընտրատեղամասեր. «Եթե կարիք կա, գնում են, օգնում են՝ հասնեն տեղամաս»:
Ա. Շառոյանը ընտրապայքարը «թեժ» որակեց՝ հավելելով, որ որևէ խախտում չկա. «Խնդիրներ լինում են, երբ խախտումներ են լինում»:
Նշելով, որ ընտրատեղամասերում արտասահմանյան դիտորդների ներկայության մասին տեղյակ չէ, Ա. Շառոյանը հավելեց, որ տեղական դիտորդներ կան:
