Իրանի Ատոմային էներգիայի կազմակերպության ղեկավար Ֆերեյդուն Աբբասի Դավանիի հայտարարությունն առ այն, որ Թեհրանը սխալ տեղեկություն է տարածել իր միջուկային ծրագրի մասին՝ արևմտյան հատուկ ծառայություններին մոլորության մեջ գցելու համար, ավելի են սրում միջազգային հանրության մտավախությունները: Այս մասին, РИА Новости-ի հաղորդմամբ, հայտարարել է ԱՄՆ Պետադեպարտամենտի պաշտոնական ներկայացուցիչ Վիկտորյա Նուլանդը:
«Դա խոսում է այն մասին, որ Իրանն ի վերջո հրապարակավ խոստովանել է, որ ստում է իր միջուկային ծրագրի հարցում,- ասել է նա:- Դա ավելի է սրում միջազգային հանրության մտավախությունները` կապված այն բանի հետ, ինչ իրականում տեղի է ունենում Իրանում»:
Հիշեցնենք, Լոնդոնում տեղակայված «Ալ-Հայաթ» թերթին տված հարցազրույցում Աբբասի Դավանին ասել էր, որ իսլամական հանրապետության ղեկավարության կողմից ապատեղեկատվության տարածման պատճառը արևմտյան մի շարք երկրների հատուկ ծառայությունների ակտիվ աշխատանքն է: Գլխավոր լրտեսների թվում նա մասնավորապես առանձնացրել է բրիտանական ՄԻ-6-ը:
