Կիպրոսի կառավարությունը չի ուսումնասիրում եվրոգոտուց դուրս գալու հնարավորությունը: Այս մասին հաղորդում է Associated Press-ը` վկայակոչելով տեղի ԶԼՄ-ները:
Կառավարության հայտարարությունն արվել է այն բանից հետո, երբ արևմտյան ԶԼՄ-ներում հրապարակվեց Կիպրոսի իշխող «Աշխատավոր ժողովրդի առաջադիմական կուսակցության» գլխավոր քարտուղար Անդրոս Կիպրիանուի հայտարարությունը` եվրոգոտում մնալու նպատակահարմարության առնչությամբ: Իր հարցազրույցներից մեկում Կիպրիանուն ասել էր, որ եթե «եռյակի» (Եվրամիության, Արժույթի միջազգային հիմնադրամ, Եվրոպական կենտրոնական բանկ) պահանջները խստանան, ապա կդրվի այն հարցը, թե արժե՞ դրանց ենթակվել: «Ոչ մի բան չեմ կանխատեսի, բայց կարծում եմ, որ այդ հարցի քննարկմանը պետք է շատ լուրջ վերաբերվել»,- ասել էր նա:
Կառավարության պաշտոնական հայտարարության մեջ ասվում է, որ այս պահին «նախագահը և կառավարությունը չեն ուսումնասիրում Եվրամիությունից և եվրոգոտուց դուրս գալու հնարավորությունը»:
Ավելի վաղ՝ սեպտեմբերի 16-ին, Կիպրոսի ֆինանսների նախարար Վասսոս Շիարլին հայտարարել էր, որ երկրի համաձայնագիրը «եռյակի» հետ կստորագրվի առաջիկա շաբաթներին:
