Ներկա պահին ԱԺ-ում քննարկվում է ՀՅԴ-ի կողմից ՀՀ գազամատակարարման համակարգի գործունեության ԱԺ ժամանակավոր հանձնաժողով ստեղծելու մասին ԱԺ որոշման նախագիծը, որը ՀՅԴ-ն համարել է արտահերթ:
Սակայն քննարկմանը ներկա չեն կառավարության ներկայացուցիչները: Վահան Հովհաննիսյանը, խոսելով հանձնաժողովի անհրաժեշտության մասին, նկատեց, որ իրենց ամբողջական վերլուծություն չի տրամադրվել, և այս պարագայում գործ ունենք մենաշնորհի հետ, բայց եթե մենաշնորհ էլ է, ապա պետք է սահմանված լինի օրենքով, բայց այդ օրենքը չկա:
Արդյունքում ունենք մի վիճակ, երբ Սուրգութից գազը Հայաստան հասցնելու համար ծախսն այնքան է, որքան սահմանից՝ մեր տներ, ինչը մտահոգիչ է:
Արծվիկ Մինասյանն էլ, անդրադառնալով կառավարության բացակայության հանգամանքին, նկատեց, թե ինչու կառավարությունը ներկա չէ քննարկմանը և համաձայն չէ հանձնաժողովի ստեղծմանը: Արծվիկ Մինասյանի խոսքերով, պատճառն այն է, որ նրանք պետք է պատասխանեն և անդրադառնան 4 բաց հարցերի:
Քննարկման վերջում Վահան Հովհաննիսյանը առաջարկեց քվեարկությունը հետաձգել մինչև հաջորդ քառօրյան: