«Հրապարակ»-ը տեղեկացավ, որ ՀՀ առողջապահության նախարարությունը դատական հայցեր է ներկայացնում մի շարք ատամնաբուժարանների դեմ` նրանց գործունեության արտոնագրերը` լիցենզիաներն անվավեր ճանաչելու պահանջով: Բանն այն է, որ ապրիլ-մայիս ամիսներին նախարարությունը ստուգումներ է իրականացրել մի շարք ատամնաբուժարաններում ու բազմաթիվ թերություններ, լիցենզիայի կանոններին չհամապատասխանող խախտումներ հայտնաբերել` ոչ սանիտարահիգիենիկ վիճակ, անհրաժեշտ սարքավորումների, մասնագետների բացակայություն և նմանատիպ այլ խախտումներ: Ձեռքի տակ ունենալով ստուգումների արդյունքում կազմված ակտերը, նախարարությունը մտել է դատարան` համապատասխան ատամնաբուժարանների լիցենզիան դադարեցնելու պահանջով: Չնայած որոշ ատամնաբուժարանների մասով նախարարության պահվածքն արդարացված է, քանի որ դրանք իրոք չեն համապատասխանում լիցենզիայի պահանջներին, սակայն որոշների դեպքում ստուգումների արդյունքները չափազանցված են: Այսինքն` ինչ-որ փոքրիկ, աննշան խախտման համար նախարարությունն ակտ է գրել և դիմել դատարան:
Թերթի հետ զրույցում մի քանի ատամնաբուժարանների ղեկավարներ կարծիք հայտնեցին, որ սրանով կոնկրետ խնդիր է լուծվում: Մասնավորապես, որոշ տեղեկություններով, նպատակ կա ստեղծել մի ֆիրմա, որի ենթակայության տակ կգործեն բոլոր ատամնաբուժարանները: Այսինքն` փորձ է արվում այս ոլորտը ևս մոնոպոլացնել, իսկ թե ում է պատկանելու այդ մենաշնորհը, դեռևս անհայտ է: ՀՀ առողջապահության նախարարության լիցենզավորման վարչության պետից «Հրապարակ»-ը փորձեց ճշտել, թե այդ ինչպես են լիցենզիայի պահանջներին չհամապատասխանող ատամնաբուժարանները լիցենզիա ստացել և գործունեություն ծավալել, որ հիմա էլ զրկվում են լիցենզիայից: Վարչության պետ Արմեն Աողոյանի խոսքով, դա եղել է օրենքի շրջանակներում, այսինքն, մինչ այս հինգշաբթի կայացած կառավարության նիստը, լիցենզավորման վարչությունը լիցենզիա ստանալու համար իրենց դիմած կազմակերպությանը համապատասխան թույլտվությունը տրամադրել է միայն ներկայացված փաստաթղթերի հիման վրա: «Սովորաբար հայտը ներկայացվում էր, ներկայացված փաստաթղթերի հիման վրա մենք լիցենզիան տրամադրում էինք, իսկ եթե հետագայում պարզվում էր, որ այդ մարդն ավանտյուրիստ է, զրկվում էր լիցենզիայից և պատժվում»,- ասաց Սողոյանը: Սակայն կառավարության վերջին նիստի ժամանակ որոշում է ընդունվել, համաձայն որի` լիցենզավորման վարչությունը լիցենզիա տրամադրելուց առաջ պարտավոր է գնալ և տեղում համոզվել, թե ինչ կարգի ընկերության են իրենք արտոնագիր տրամադրում, և եթե պարզվի, որ թերություն կա, բնականաբար, Սողոյանի խոսքով, լիցենզիա չի տրամադրվի: Լիցենզիա տրամադրելու նոր կարգը կգործի 3 ամսից: Սողոյանը տեղյակ չէր, թե քանի ատամնաբուժարան է զրկվելու լիցենզիայից, քանի որ դա դատական կարգով է տեղի ունենալու, իսկ թե նախարարությունը լիցենզիայից զրկելու պահանջով քանի ատամնաբուժարանի դեմ է հայց ներկայացրել, դժվարացավ ասել: Թերթի տեղեկություններով, լիցենզավորման վարչության և նրա պետի աշխատանքից կան դժգոհություններ, և չի բացառվում, որ այստեղ ևս կադրային փոփոխություններ տեղի ունենան:
