ՀԱՊԿ-ի Օպերատիվ արձագանքման հավաքական ուժերի «Փոխհամագործակցություն-2012» զորավարժությունների անցկացումը ազդանշան է առ այն, որ Ռուսաստանը հասկանում է իր դերը՝ որպես կազմակերպության նախաձեռնող, և իր պարտականությունները դաշնակիցների, այդ թվում՝ Հայաստանի առջև, որը կարող է հայտնվել զինված հակամարտության կենտրոնում: Նման կարծիք է հայտնել Ռազմավարական հետազոտությունների ռուսական ինստիտուտի Սևծովյան-կասպիական կենտրոնի ղեկավար, փորձագետ Էդուարդ Պոպովը:
Նա նշել է, որ մի կողմից Ռուսաստանի և մյուս կողմից ԱՄՆ-ի և ՆԱՏՕ-ի միջև շարունակվում է մրցապայքարը Հարավային Կովկասում՝ այդ տարածաշրջանում դոմինանտ ներկայություն և ազդեցություն պահելու, այդ թվում՝ Հայաստանի համակրանքը շահելու համար: ՆԱՏՕ-ի գլխավոր քարտուղար Անդերս ֆոգ Ռասմուսենի այցը Երևան և ՀԱՊԿ զորավարժությունները որոշակիորեն փոխկապակցված են,- կարծում է նա:
Փորձագետը նշել է, որ տարածաշրջանում իրավիճակը սրվում է, Բաքուն թշնամական հայտարարություններ է հնչեցրել՝ կապված Իրանի կողմից ատմոային զենք ստեղծելու հնարավորության հետ:
«Լուրջ մտավախություն է առաջանում առ այն, որ կարող են ապասառեցվել մի քանի հակամարտություններ, ընդ որում՝ ինչպես տեղական, այնպես էլ տարածաշրջանի սահմաններից դուրս եկող. դա Լեռնային Ղարաբաղի հակամարտությունն է, Իրանի վրա հնարավոր հարվածները, սիրիա-թուրքական սահմանի վրա բախումները, Թուրքիայի կառավարության դեմ քուրդ ապստամբների գործողությունները»,- փորձագետի խոսքերն է մեջբերում է Rosbalt գործակալությունը:
Ավելացնենք, որ մի շարք փորձագետների կարծիքով՝ ԱՄՆ-ը պատրաստ է Ադրբեջանին կցել Իրանի հյուսիսային ադրբեջանաբնակ տարածքները, եթե Ադրբեջանը մասնակցի Իրանի դեմ ռազմական գործողությանը՝ հօգուտ Արևմուտքի:
Ադրբեջանը, վերլուծաբանների կարծիքով, գտնվում է Հայաստանի հետ պատերազմի շեմին: Անկարան արդեն որերորդ անգամ Բաքվի հետ բանակցություններում հիշատակում է, որ հայկական զորքերը պետք է դուրս գան Ղարաբաղից:
