Ռուսական Независимая Газета թերթը անդրադարձել է Ռուսաստանի Դաշնային խորհրդի փոխխոսնակ Ալեքսանդր Տորշինի` Վրաստանի իշխանություններին ուղղված մեղադրանքին և վրացական կողմի պատասխանին:
Տորշինը հայտարարել է, թե «Դոմոդեդովո» օդանավակայանում տեղի ունեցած ահաբեկչության հետևում կանգնած է Սաակաշվիլիի ռեժիմը:
Երեկ այս հայտարարությանը պատասխանել է Վրաստանի փոխարտգործնախարար Նինո Կալանդաձեն՝ ասելով, որ նման անլուրջ հայտարարությունների հետևում կարող են ավելի լուրջ մտադրություններ լինեն: «Սա ռուսական հատուկ ծառայությունների քարոզչության մի մասն է, որի նպատակը Ռուսաստանի ներքին անցանկալի իրավիճակից ուշադրության շեղումն է: Այս դեպքում խոսքը նպատակային սադրանքի մասին է»,- ասել էր Կալանդաձեն:
Վրացական կողմը մեկնաբանել է նաև ՌԴ նախագահ Դմիտրի Մեդվեդևի այն հայտարարությունը, որ Սոչիի ձմեռային օլիմպիական խաղերի անցկացման ընթացքում պետք է հատուկ ուշադրություն դարձնել «վրացական գործոնի» վրա: Իսկ վրացական կողմը այս հայտարարությանը հակադարձել էր, թե չի պատրաստվում որևէ կերպ խոչընդոտել օլիմպիական խաղերին՝ շեշտելով, որ դա իրենց հնարավորություններից վեր է: