«Վաղը՝ սեպտեմբերի 22-ին, աշնանային գիշերահավասարն է: Այն շարժական օր է և ամեն տարի փոփոխվում է: Նախորդ տարի այդ օրը սեպտեմբերի 23-ին էր: Այն տեղի է ունենալու համաշխարհային ժամանակով ժ. 14:49-ին, իսկ մեր ժամանակով՝ 17:49-ին»,- լրագրողների հետ հանդիպմանը հայտնեց Բյուրականի աստղադիտարանի առաջատար գիտաշխատող Արեգ Միքայելյանը:
Նրա խոսքով՝ այդ օրը գիշերվա և ցերեկվա տևողությունը հավասարվում է, որից հետո գիշերն ավելի երկար է տևում, քան ցերեկը. «Աստղագիտության մեջ ասվում է, որ սկսվում է աստղագիտական աշունը: Իրականում այսօր ամառվա նախավերջին օրն է»:
Բանախոսը խոսեց նաև Բյուրականում կանոնավոր կերպով անցկացվող միջազգային դպրոցի մասին. «Բյուրականում 2006 թվականից սկսվել է միջազգային դպրոցների շարքը: Դրանք անցկացվում են երկու տարին մեկ: Այս տարի արդեն 4-րդ անգամն է»:
Նա նշեց, որ ամառային դպրոցը նախատեսված է երիտասարդ մասնագետների վերապատրաստման համար. «Այդ դպրոցը առանձին միջոցառում է և տեղի է ունենում ուսումնական շրջանից դուրս: Հրավիրվել են դասախոսներ տարբեր երկրներից՝ Ռուսաստանից, Ուկրաինայից, Ֆրանսիայից, Լեհաստանից, Գերմանիայից, Իտալիայից, Իսպանիայից, ԱՄՆ-ից և Իրանից: Դասախոսներ և ուսանողներ կան նաև Հայաստանից»:
Միքայելյանը փաստեց, որ Հայաստանի ուսանողները, ի տարբերություն արտասահմանյան ուսանողների, առավելություն ունեն. «Արտասահմանցի ուսանողներն ավելի խիստ են ընտրվում: Հայաստանյան ուսանողների համար մրցույթն անցնելն ավելի հեշտ է: Նրանք ունեն քանակային առավելություն: Նախորդ տարի 117 հայ ուսանողից 32-ը հրավիրվել են արտասահմանից: Այս տարի 82 հայ դիմորդից ընտրել ենք ընդամենը 12-ին: Պատճառն այն է, որ այս տարի ունեինք ֆինանսավորման հետ կապված խնդիրներ»:
Հաջորդ շաբաթ կայանալու է Անանիա Շիրակացու 1400-ամյակին նվիրված միջազգային միջոցառումը, որը կտևի երեք օր: «Առաջին անգամ հրավիրվելու են տարբեր ոլորտների գիտնականներ` համատեղ քննարկումներ անցկացնելու նպատակով: Մենք որոշել էինք ավելի շատ մասնագետների հրավիրել արտասահմանից, բայց ֆինանսական խնդիրներ առաջացան: Կառավարությունն ի սկզբանե այդ միջոցառման համար նախատեսել էր 8 մլն դրամ, բայց հատկացվեց ընդամենը մեկ միլիոն՝ տեղական ծախսերի համար»,- հավելեց Միքայելյանը:
