Սեպտեմբերի 23-ին Արագածոտնի մարզի Գեղաձոր գյուղում կայանալիք ՏԻՄ ընտրություններից առաջ գյուղացիներին որպես ընտրակաշառք դիզվառելիք են բաժանում: Բայց անգամ դա անում են պետության հաշվին: Բանն այն է, որ ՀՀ կառավարության ծրագրով այս օրերին մի շարք գյուղերում պետք է բաժանվի դիզվառելիք 9500 դրամով: Սակայն Գեղաձորում գործող գյուղապետը բաժանում է 6500 դրամով:
Չկա՞ր ավելի հարմար մտահղացում ընտրակաշառք բաժանելու համար: «Ժողովուրդ»-ի այս հարցին Գեղաձորի գործող գյուղապետ, ՀՀԿ-ի թեկնածու Յուրա Մարգարյանը պատասխանեց. «Այդ ամենը կապ չունի ընտրության հետ, դա կառավարության որոշումն է, որով աջակցում է գյուղացիներին»: Եվ օգտվելով առիթից`«քար գցեց» ԲՀԿ-ական թեկնածու Գաբրիել Մալխասյանի «բոստանը»`ասելով թե ԲՀԿ-ն է դիզվառելիք բաժանում:
