Վրաստանի նախագահ Միխեիլ Սաակաշվիլին հայտարարել է, որ Թբիլիսիի Գլդան բանտի դատապարտյալներին նվաստացումների ենթարկելու մասին տեսագրությունը պատվիրված է իր հակառակորդների կողմից խորհրդարանական ընտրություններից առաջ, գրում է Interfax-ը:
«Իհարկե, տեղի ունեցածը համակարգի մեծ բացթողում է, բայց կոնկրետ մի մարդ, ով ներգրավված է այս ամենի մեջ և ում այսօր կոչում են հերոս, ամիսներ շարունակ զբաղվել է տեսագրությամբ, որպեսզի հետագայում վաճառի այդ կադրերը»,- ասել է Սաակաշվիլին զինվորականներին բնակարաններ հանձնելու արարողության ժամանակ:
Վրացի նախագահի խոսքերով` բանտարկյալներին կտտանքների ենթարկելու մասին «վճարված տեսագրությունները» Վրաստանի դեմ նախագծի մասն են կազմում:
Սաակաշվիլին ընդգծել է, որ պետությունը ստանձնում է տեղի ունեցածի պատասխանատվությունը, սակայն դա հիմք չի կարող հանդիսանալ, որպեսզի Վրաստանը վերադառնա ոչ վաղ անցյալին, երբ էլեկտարականություն տրվում էր միայն ոստիկանական բաժանմունքին, այն էլ կտտանքներ իրականացնելու համար:
Հիշեցնենք, որ բանտարկյալներին կտտանքների ենթարկելու մասին տեսանյութը դիտելուց հետո հազարավոր մարդիկ դուրս էին եկել Թբիլիսիի փողոցներ` բողոքի ակցիաներին մասնակցելու: Ցուցարարները պահանջել են ներքին գործերի նախարար Բաչո Ախալայայի հրաժարականը, որը ավելի վաղ գլխավորել է պատիժների կատարման դեպարտամենտը:
