Հունաստանի դատախազությունը ֆինանսների նախարարությունից խնդրել է այն քաղաքական գործիչների ցուցակը, որոնց կասկածում են ապօրինի հարստացման մեջ:
Մամուլում հրապարակում էր հայտնվել 33 պատգամավորներից կազմված ցուցակի մասին: Կասկածելի քաղաքական գործիչների եկամուտներին մի քանի ամիս հետևել է ֆինանսների նախարարության՝ տնտեսական հանցագործությունների ծառայությունը: Ըստ հրապարակման` այդ պատգամավորները երկու խոշոր խորհրդարանական խմբակցություններից են («Նոր ժողովրդավարություն» և «Համահունական սոցիալական շարժում»):
Հունաստանի դատախազությունը որոշել է ստուգել` իսկապե՞ս նման ցուցակ գոյություն ունի, թե՞ ոչ: Եթե տեղեկությունը հաստատվի, ապա կիրականացվի լայնամասշտաբ հետաքննություն այդ խորհրդարանականների եկամուտների օրինականության ստուգման առնչությամբ: Այս մասին հաղորդում է Rosbalt.ru-ն՝ հղում անելով հունական գործակալություններին:
Հունաստանի ֆինանսների նախարարության հատուկ ծառայությունների աշխատակիցները ուսումնասիրել են շուրջ 500 նախկին և գործող պատգամավորների եկամուտները, որոնցից 33-ի իրական և հայտարարված եկամուտների միջև հայտնաբերվել են տարբերություններ:
Նրանց բանկային հաշիվները ժամանակավորապես կսառեցվեն: Պատգամավորների նկատմամբ խոշոր տուգանքներ կսահմանվեն, իսկ հարկային ծառայությունից թաքցված գումարները կգանձնվեն հօգուտ պետության:
Հավելենք, որ Հունաստանի իշխանությունները վերջին շրջանում կտրուկ խստացրել են պայքարը հարկերի վճարումից խուսափողների դեմ՝ բյուջեն լցնելու և դեֆիցիտը կրճատելու նպատակով:
