Սիրիական հակամարտությունը կարող է Թուրքիայում լուրջ ներքին քաղաքական ճգնաժամի պատճառ դառնալ: Վարչապետ Ռեջեփ Թայիփ Էրդողանի քաղաքական կուրսը, որը Դամասկոսի ռեժիմի ամենավճռական հակառակորդներից է, բազմաթիվ հարցեր է առաջացնում հենց Անկարայում:
Ընդդիմությունը քննադատում է իշխանություններին այն բանի համար, որ նրանց միջամտությունը սիրիական հակամարտությանը ապակայունացրել է իրավիճակը սահմանամերձ շրջաններում: Տեղի բնակիչները բողոքում են սիրիացի 83 հազար փախստականների և Ասադի զինված հակառակորդների ներկայությունից: Սա լուրջ ահազանգ է Անկարայի համար:
Տեղացիների շարքում քիչ չեն Դամասկոսին համակրող շիաները, որոնց բախումը սիրիացի ընդդիմադիրների հետ միջկրոնական հողի վրա կարող է վերածվել զինված հակամարտության: Նման սցենարով են զարգանում իրադարձություները Լիբանանում:
Սիրիացիների հոսքի դեմ վերահսկողություն իրականացնելն ավելի ու ավելի դժվար է դառնում: Փորձագետները չեն բացառում, որ ընդդիմության ճնշման ներքո կառավարությունը կվերանայի Սիրիայի հանդեպ քաղաքականությունը: Այս մասին հաղորդում է Kommersant-ը:
Սիրիայի պատերազմը քաղաքական կրքեր է բորբոքել Անկարայում: Գլխավոր ընդդիմադիր ուժը` Ժողովրդա-հանրապետական կուսակցությունը, արտգործնախարար Ահմեդ Դավութօղլուին մեղադրել է սիրիական ուղղությամբ ձախողման համար և պահանջել նրա հապճեպ հրաժարականը: Կուսակցության ղեկավարի տեղակալ Գյուրսել Տեկինը համոզված է` Դավութօղլուի պաշտոնաթողությունը միակ հնարավորությունն է թուրքական կառավարության համար` հետ մղելու իր հասցեին ուղղված քննադատությունների ալիքը:
Թուրքիայում քաղաքական ճգնաժամի ֆոնին երկրի հարավ-արևելքում ակտիվանում են քուրդ գրոհայինները:
Էրդողանի հակառակորդները պահանջում են, որպեսզի Թուրքիան դուրս հանի բոլոր սիրիացիներին, որոնք, նրանց կարծիքով, սպառնում են երկրի ներքին անվտանգությանը:
