Հարևաններից մեկը՝ Թելի Բաբուրյանն է ահազանգել հրշեջ ծառայություն: Հրշեջները բավական արագ են արձագանքել և տեղ հասնելուն պես հանգցրել են մեկսենյականոց բնակարանում սկսված հրդեհը:
Դեպքի վայր ժամանած ոստիկանները, հայտնաբերելով տանը հրդեհի պահին միայնակ եղած երեխաներին՝ 2-ամյա Անահիտին և 4-ամյա Ալեքսին, նրանց տեղափոխել են Վանաձորի թիվ 1 հիվանդանոցային համալիր, սակայն, հարևանների և ականատեսների վկայությամբ, նրանք արդեն անշնչացած էին:
Ոչ իրենց սեփական, այլ հորաքրոջ տանը բնակվող երիտասարդ ամուսնական զույգը, հարևանների վկայությամբ, մշտական աշխատանք չի ունեցել, ընտանիքի հայրն օրավարձով աշխատելով է ապրուստի փող վաստակել ընտանիքը պահելու համար: Ըստ Թելի Բաբուրյանի` մայրը հաճախ էր երեխաներին միայնակ թողնում տանը՝ դուռը փակելով նրանց վրա:
Վանաձորի «Նարեկ» հիվանդանոցային համալիրի փոխտնօրեն, մանկական ծառայությունների գծով գլխավոր բժշկի տեղակալ Հրաչյա Ազարյանի խոսքով, տուժածներ` 2007թ. ծնված Ալեք և 2009թ. ծնված Անահիտ Քարադանյանները հիվանդանոց հասցվել են համարյա մահամերձ:
Քնած ժամանակ ծխից խեղդված երեխաների վերակենդանացման ուղղությամբ բժիշկների ջանքերն անցել են ապարդյուն:
Լոռու մարզի քննչական բաժնի քննիչ, որտիկանության լեյտենանտ Տարոն Թադևոսյանը տեղեկացրեց, քրեական գործ է հարուցվել ՀՀ քրեական օրենսգրքի 232 հոդվածի 2-րդ մասով (հրդեհային անվտանգության կանոնները խախտելը) ու կատարվում է նախաքննություն:
Դեռևս միայն դեպքի վայրի զննություն է կատարվել, առաջնահերթ քննչական գործողություններն ընթացքի մեջ են:
Հրդեհի պատճառի, օջախի տարածման ուղղությունների հետ կապված տեղեկություններ, դատաբժշկական փորձաքննության եզրակացություն առայժմ չկան:
