Սեպտեմբերի 17-ին «Մենք կարող ենք» (Let’s do it! Armenia) շարժման կողմից տարածվել էր մամլո հաղորդագրություն՝ «Հայաստանն առանց աղբի» կամավորական նախաձեռնության շրջանակներում Էրեբունի պատմահնագիտական արգելոց-թանգարանի Կարմիր բլուր հնավայրի տարածքում իրականացված մաքրման աշխատանքների ընթացքում կենցաղային աղբով հնավայրի տարածքն աղտոտելու վերաբերյալ:
Ինչպես տեղեկացանք մամուլից, այդ միջադեպի «հերոսը» «Էլնոր» ընկերության աշխատակից է, սակայն «Էլնոր» ընկերությունը չի ցանկանում պատասխանատվություն կրել իր աշխատակցի կողմից թույլ տված անընդունելի արարքի համար:
Քանի որ ընկերությունը ողջունել է շարժման նպատակներն ու գործունեությունը (ըստ մամուլում տարածված տեղեկատվության), իսկ մենք ողջունում ենք միայն սոցիալական պատասխանատվություն կրող ընկերություններին, «Մենք կարող ենք» (Let’s do it! Armenia) շարժումը դիմում է «Էլնոր» ընկերությանը՝ պահանջելով.
1. Հրապարակավ ընդունել ընկերության պատասխանատվությունն իր աշխատակիցների աշխատանքային գործունեության համար և ներողություն խնդրել տարածքը մաքրած երիտասարդներից:
2. Սեփական ռեսուրսներով մաքրել աղտոտված տարածքը:
Շարժման կողմից ներկայացված պահանջները չիրականացնելու դեպքում շարժումը պատրաստ է տեր կանգնել մաքրված տարածքներին և աղտոտողների դեմ տանել հետևողական պայքար՝ օգտագործելով հանրությանը հասանելի բոլոր միջոցները:
Շարժումը կրկին ցանկանում է հիշեցնել, որ սպասում է պետական մարմինների՝ մասնավորապես Երևանի քաղաքապետարանի, ՀՀ Մշակույթի նախարարության և ՀՀ Բնապահպանության նախարարության արձագանքին միջադեպի վերաբերյալ: Շարժումն ակնկալում է նրանցից գործնական քայլեր հնավայրը փրկելու գործում:
