ԱՄՆ-ի դեսպանատան վրա զանգվածային հարձակումներ և մի շարք իսլամական երկրներում անկարգություններ հրահրած «Մուսուլմանների անմեղությունը» ֆիլմում նկարահանված վրացի դերասանուհի Աննա Գուրջին (Գիորգոբիանի) բացահայտել է նկարահանումների մանրամասները: Նրա խոսքով` սցենարը լիովին այլ է եղել, իսկ Մուհամմեդը սկզբում Ջորջ է եղել, հաղորդում է Russia.ru-ն:
«Ես գաղափար չունեի, որ Ջորջը կփոխվի Մուհամմեդի: Ինձ ասել էին, որ ես պետք է Հիլարիրը լինեի` Ջորջ անունով հերոսի երիտասարդ հարսնացուն: Ֆիլմը Հին Մերձավոր Արևելքում ընկնող գիսավորի մասին էր: Ըստ սցենարի` այնտեղ ապրում են տարբեր ցեղեր, որոնք կարծում են, թե գիսավորը սուրբ է և պայքարում են դրա համար»,- բրիտանական թերթին տված հարցազրույցում պատմել է դերասանուհին:
Դերասանուհու խոսքով` իրեն ասել են, որ ֆիլմը հարուստ է լինելու հատուկ էֆեկտներով: Դրա համար այն ֆիլմի մեծ մասը նկարահանվել է կանաչ էկրանի ֆոնի վրա: «Ֆիլմն անհավանական ցածր բյուջե ուներ: Ես օրական 75 դոլար եմ ստացել: Ես գաղափար չունեի, որ այդ ամենն այդպես կաղավաղվեր»,- Գուրջիի խոսքն է մեջբերում РИА Новости-ն:
Նրա խոսքով` ո՛չ ինքը, ո՛չ մյուս դերասանները չեն իմացել, որ ֆիլմի հեղինակները կփոխեն սցենարը: Դերասանուհու քույրը հայտնել է, որ ԱՄՆ-ում Գուրջիին թիկնապահներ են պահպանում, փոխանցում է Интерфакс-Запад-ը:
Ինչպես գրել է Дни.Ру-ն` սկանդալային «Մուսուլմանների անմեղությունը» ֆիլմի 65-ամյա ռեժիսորը մի քանի պոռնոֆիլմերի հեղինակ է:
Նշենք, որ «Մուսուլմանների անմեղությունը» ֆիլմի դեմ ցույցեր տեղի են ունենում համացանցում դրա հայտնվելուց հետո: Ցույցերի մասնակիցները հարձակվել էին Լիբիայում ԱՄՆ-ի դեսպանատան վրա, որի հետևանքով 4 մարդ էր մահացել, նրանց թվում` ԱՄՆ-դեսպանը: Բողոքի ակցիաներն առավել թեժ են Եգիպտոսում և Եմենում, ելույթներ են տեղի ունեցել նաև Սուդանում, Թունիսում, Պակիստանում և Բանգլադեշում:
