Ազատազրկման մեջ գտնվող Ուկրաինայի նախկին վարչապետ Յուլյա Տիմոշենկոն ուկրաինացի և գերմանացի մասնագետների վերահսկողության ներքո ևս մեկ ամիս կանցկացնի հիվանդանոցում: Ria.ru-ի փոխանցմամբ` այս մասին հայտնել է Ուկրաինայի առողջապահության փոխնախարար Ռաիսա Մոիսեենկոն:
«Ամենաքիչը մեկ ամիս, հնարավոր է՝ չորս-վեց շաբաթ»,- ասել է նա՝ հավելելով, որ նման որոշում է կայացվել՝ հաշվի առնելով իր՝ Տիմոշենկոյի խնդրանքը և գերմանացի մասնագետների առաջարկը: «Յուլյա Տիմոշենկոն այժմ զբաղվում է բուժիչ մարմնամարզությամբ»,- նշել է Մոիսեենկոն:
Բեռլինի «Շարիտե» կլինիկայի նյարդաբան, Տիմոշենկոյի բուժող բժիշկ Լուտց Հարմսը հայտնել է, որ նրա առողջական վիճակում առաջընթաց է նկատվում՝ հավելելով, որ բժիշկներն, ամեն դեպքում, ավելիին էին սպասում: Նա նաև ասել է, որ մոտ շաբաթներս Տիմոշենկոյին ավելի ինտենսիվ բուժում կնշանակվի:
2009 թվականին Ռուսաստանի հետ գազային պայմանագիր կնքելու ժամանակ պաշտոնեական իրավասությունները չարաշահելու մեղադրանքով Տիմոշենկոն 2011 թվականի հոկտեմբերին դատապարտվել էր 7 տարվա ազատազրկման:
