France-Presse գործակալության փոխանցմամբ՝ Իրանն ու ԱԷՄԳ-ը կարող են Իրանի միջուկային ծրագրի վերաբերյալ նոր բանակցություններ սկսել հոկտեմբերի կեսերին: Այս մասին հայտնել են դիվանագիտական աղբյուրները:
ԱԷՄԳ-ի գլխավոր տնօրեն Յուկիա Ամանոն երեքշաբթի հայտարարել էր, որ Իրանը պատրաստ է նոր բանակցություններ սկսել, սակայն չէր նշել, թե դրանք երբ տեղի կունենան: Նա հավելել էր, որ ԱԷՄԳ-ը չի կարող երաշխավորել, որ Իրանն աշխատանքներ չի տանում միջուկային զենքի տեխնոլոգիաների ստեղծման ուղղությամբ:
Ամանոյի խոսքերով՝ ԱԷՄԳ-ը հուսով է, որ Իրանի հետ կարող է պայմանավորվածության հասնել նրա միջուկային ծրագրի վերաբերյալ արդյունավետ երկխոսություն ծավալելու շուրջ: Սեպտեմբերի 13-ին ԱԷՄԳ-ի ղեկավար խորհուրդը համաձայնեցրել էր Իրանի միջուկային ծրագրի վերաբերյալ տեքստը: Դրա օգտին քվեարկել էր 31 երկիր, դեմ՝ 1 (Կուբա), ձեռնպահ՝ 3 (Էկվադոր, Եգիպտոս և Թունիս):
Փաստաթղթում լուրջ մտահոգություն էր հայտնվում Իրանի միջուկային ծրագրի զարգացման կապակցությամբ, ինչպես նաև Թեհրանին կոչ էր արվում համագործակցել ԱԷՄԳ-ի տեսուչների հետ և նրանց թույլ տալ մուտք գործել սեփական միջուկային օբյեկտներ:
