Սիրիայում աճում է «օտարերկրյա տարրի», այդ թվում՝ ջիհադիստների ներկայությունը: Այս մասին հայտարարել է ՄԱԿ-ի՝ Սիրիայի հարցերով անկախ հանձնաժողովի նախագահ, բրազիլացի մարդու իրավունքների ոլորտի փորձագետ Պաուլո Պինեյրոն:
Ինչպես հաղորդում է BBC-ն, Պինեյրոյի տվյալներով՝ այդ «տարրերից» որոշները միանում են հակակառավարական խմբերին, այն դեպքում, երբ մյուսներն աշխատում են ինքնուրույն:
Հանձնաժողովը նաև կազմել է Սիրիայում ենթադրյալ ռազմական հանցագործների թարմացված ցուցակը և կոչ է արել ՄԱԿ-ի ԱԽ-ին Սիրիայում հանցագործությունների հետաքննությունը հանձնել Միջազգային քրեական դատարանին:
Այդ ցուցակում տեղ գտած անունները չեն հրապարակվում:
Սիրիայի իշխանությունները պնդում են, որ 2011 թ. մարտից սկսված հակակառավարական ապստամբությունը օտարերկրյա դավադրության արդյունք է, ինչպես նաև մեղադրում են Պարսից ծոցի և Արևմուտքի երկրներին ապստամբներին ֆինանսավորելու մեջ: Մեկուկես տարվա ընթացքում, ՄԱԿ-ի տվյալների համաձայն, Սիրիայում զոհվել է ավելի քան 20 հազար մարդ:
ՄԱԿ-ի՝ Սիրիայի հարցերով անկախ հանձնաժողովը ձևավորվել է 2011 թ. օգոստոսին՝ ՄԱԿ-ի մարդու իրավունքների խորհրդի կողմից:
