Ուղիղ 1 տարի առաջ Նյու Յորքում սկիզբ է առել «Գրավիր Ուոլ Սթրիթը» ակցիան` հետագայում տարածվելով շատ այլ քաղաքներում և երկրներում: Այսօր «գրավողները» պատրաստվում են նշել իրենց առաջին տարեդարձը` «քայլերթ» կազմակերպելով դեպի Նյու Յորքի ֆոնդային բորսա,- հաղորդում է ИТАР-ТАСС-ը:
Շարժման ներկայացուցիչների խոսքերով` ցուցարարները պատրաստվում են հարձակվել քաղաքի ֆինանսական կենտրոնի վրա, շրջափակել բորսայի շենքը և խանգարել աշխատանքի շտապող միջնորդներին հասնել այնտեղ: Բացի դրանից` ինչպես հայտնի է դառնում ցուցարարարների կայքից` նրանք մտադիր են «նստացույցեր» կազմակերպել քաղաքի աշխատանքային թաղամասի բոլոր խաչմերուկներում:
Ցուցարարների գլխավոր կարգախոսն է` «Մենք` 99 տոկոսը», որով նրանք արտահայտում են իրենց դժգոհությունն այն բանից, որ ազգային հարստության մեծ մասը ղեկավարում է Ամերիկայի բնակչության ընդամենը մեկ տոկոսը:
Չնայած բողոքի ակցիաների տարեդարձի օրը պաշտոնապես այսօր է` մոտ 300 մարդ «տոներ» է կազմակերպել դեռ շաբաթ օրը: Նրանք հավաքվել են Զուկոտի զբոսայգու մոտ՝ Ներքին Մանհեթենի տարածքում: Ոստիկանությունը հայտնել է, որ հասարակական կարգի խախտման համար ձերբակալվել է 12 մարդ:
