Վերջին շրջանում լուրեր են պտտվում, որ ՀԱԿ-ԲՀԿ համագործակցություն ի վերջո հանգեցնելու է նրան, որ առաջիկա նախագահական ընտրություններին այս երկու քաղաքական ուժերն ունենալու են մեկ միասնական թեկնածու՝ ի դեմս Ռոբերտ Քոչարյանի:
Այսօր Aravot.am-ը ԲՀԿ պատգամավոր Միքայել Մելքումյանից ճշտել է՝ բացառո՞ւմ եք, որ Ռոբերտ Քոչարյանը կլինի ՀԱԿ-ԲՀԿ միասնական թեկնածուն: Նա պատասխանել է. «Ճիշտն ասած, դեռ քննարկումներ չեն եղել: Ընդհանրապես որևէ բան չի կարելի բացառել, բայց դեռևս որևէ քննարկում չկա, որևէ որոշում չկա: Այնպես որ, հենց որ լինի՝ անպայման դուք կիմանաք: Բայց որևէ տարբերակ ես չեմ բացառում»: Հարցին՝ հնարավո՞ր է , որ սա այն տարբերակն է, որ առանց կրակ ծուխ չի լինում, այսինքն՝ կա նման տարբերակ՝ պարոն Մելքումյանը պատասխանել է. «Չէ,գիտեք ինչ, տարբեր վարկածներ կարող են լինել, որոնց հիմքերն այսօր չկան: Կան վարկածներ, որոնցից ամեն մեկի հավանականությունը տարբեր տոկոսներով կարող է արտահայտվել»:
Վերջինս նաև մեկնաբանել է Ռոբերտ Քոչարյանի բավականին սուր պատասխանը Ռուբեն Հայրապետյանին, որը տարբեր շրջանակներում ընկալվում է որպես ՀՀԿ-ԲՀԿ պատերազմի նշան: Պարոն Մելքունյանի պարզաբանմամբ՝ «Ես որևէ կերպ չէի կապի: Ասենք, Քոչարյանի ցանկացած հայտարարություն դուք պետք է ԲՀԿ-ՀՀԿ ձևաչափի մեջ քննարկե՞ք: Չէ, այդպիսի որևէ կապ ես չեմ տեսնում»: Հարցին՝ԲՀԿ-ի և Ռոբերտ Քոչարյանի մեջ է՞լ որևէ կապ չեք տեսնում՝ նա պատասխանել է. «Չէ, ես չեմ տեսնում, և չեմ էլ ուզում որևէ քաղաքական գործչի կարծիք մեկնաբանել: Կարող եք այդ հարցով դիմել իր գրասենյակին»:
ՀՀԿ խմբակցության ղեկավար Գալուստ Սահակյանը Ռոբերտ Քոչարյանի պատասխանը դիտարկում է որպես անձնական, ոչ քաղաքական: Հարցին՝ Դուք է՞լ եք դա անձնական դիտարկում՝ պարոն Մելքումյանը պատասխանել է. «Ես հետևել եմ այդ իրադարձություններին, բայց ձեր ասածի հետ որևէ կապ ես չեմ տեսնում»:
