Արմավիրի մարզի Արտաշատ համայնքի հողերի մեծ մասը անմշակ և բարձիթողի վիճակում են, տարեկան մոտ 50 հա հողատարածք վերածվում է անապատի: Ամեն տարի գյուղացիները մեծ ջանքեր են ներդնում անպատացումից խուսափելու համար, սակայն միայն սեփական միջոցները բավարար չեն:
Արմավիրի մարզպետարանի գյուղատնտեսության և բնապահպանության վարչության պետի տեղակալ Սանասար Բաղդասարյանի խոսքով, մարզում գյուղական տնտեսություններ կան, որոնց սեփականաշնորհվել են հենց աղակալած հողեր: Իսկ քանի որ 1990-91 թվերից դրենաժային համակարգը չէր մաքրվում, այդ տարածքներում տեղի ունեցան կրկնակի աղակալումներ, որի հետևանքով սեփականաշնորհված հողատարածքները դարձան անօգտագործելի:
Արտաշար համայնքի 500 հա հողատարածքից 400 հեկտարը աղակալած է: Համայնքը ի զորու չէ սեփական միջոցներով իրականացնել աղազերծման աշխատանքները: Արամը Արտաշարում է ապրում, ունի սեփականաշնորհված և տնամերձ հողամաս: Սեփականաշնորհված հողամասը ստացած օրվանից չի կարողացել մշակել: Իր իսկ խոսքով` միայն փուշ է աճում այդ աղուտներում, իսկ տնամերձ հողամասում դեռ շարունակում է պայքարել աղակալման դեմ:
Արամն ասում է, որ դրենաժները լցված են, և ոչ մի բան չի նախաձեռնվում դրանք մաքրելու համար, իրենք էլ իրենց ուժերով չեն կարող մաքրել: «Հողերի մաքրման համար նյութերն են անհրաժեշտ, դրանց հետ մեկտեղ հողերն անընդհատ ջրել է պետք, իսկ ջրելու համար բավարար քանակով ջուր, ջրի դեպքում էլ գումար է պետք, որի հնարավորությունը չկա»,- ասում է գյուղացին: Մարզպետարանի պաշտոնյան նույն կարծիքին է: «Աղազերծումը իրականացնելու համար մեծ ներդրումներ են պետք: Ներկայիս ունեցած մեր գյուղացիական, գյուղացիական կոլեկտիվ տնտեսությունները և գյուղապետարանները նման ֆինանսական միջոցներ չունեն, որ հողերը աղազերծեն:
Պետության անմիջական օգնության անհրաժեշտությունն է զգացվում, պետությունն էլ իր հնարավորությունների սահմաններում է օգնում, և աղակալած հողատարածքները ամբողջությամբ կարճ ժամկետներում վերականգնելը գրեթե անհնար բան է»,-ասում է Ս. Բաղդասարյանը: Իսկ ընդհանուր առմամբ, Արարատյան դաշտավայրում մոտ 30 հազար հեկտար հողատարածք աղակալման հետևանքով վերածվել է անապատի: Խորհրդային շրջանում մեծ աշխատանքներ են կատարվել հողերի աղազերծման ուղությամբ, և մինչև 1990 թ. աղազերծվել էին շուրջ 1500 հա աղակալած հողեր: Այսօր աղազերծված հողերը նույնպես կրկնակի աղակալման վտանգի տակ են:
