Չեխիայի իշխանությունները կեղծ ալկոհոլի հետևանքով մահացության մի շարք դեպքերից հետո արգելել են 20%-ից ավելի սպիրտ պարունակող խմիչքների վաճառքը: Այս մասին հաղորդում է BBC-ն:
Այս մասին ուրբաթ հայտնել է Չեխիայի առողջապահության նախարար Լեոշ Հեգերը: Արգելքը ուժի մեջ է մտնում անհապաղ և վերաբերում է թունդ ալկոհոլի վաճառքին բոլոր խանութներում և առևտրային ցանցերում` բարերում, սրճարաններում, ռեստորաններում և հասարակական սննդի այլ հաստատություններում, ինչպես նաև հյուրանոցներում: Արգելված է ալկոհոլ վաճառել նույնիսկ համացանցում:
Այս որոշումը կարելի է անվանել աննախադեպ` հաշվի առնելով սպիրտային խմիչքների հանդեպ ունեցած ազգային ավանդույթը:
Այսօրվա դրությամբ Չեխիայի ոստիկանությունը ձերբակալել է տասը մարդու, որոնց կասկածում են ալկոհոլի պատրաստման և վաճառքի մեջ:
Հիշեցնենք, որ կեղծ ապրանքի վաճառքի հետևանքով Չեխիայում զոհվել է 19 մարդ:
