Սկանդալային` «Մուսուլմանների անմեղությունը» ֆիլմի ռեժիսորը, որը բացասական կողմով է պատկերում Մուհամմեդ մարգարեին, մեծ փորձ ունի մեծերի համար ֆիլմերի ստեղծման մեջ: Gawker պարբերականի լրագրողներին հաջողվել է պարզել նրա անունը:
Հետաքննության արդյունքում նրանք կարողացել են հայտնաբերել ֆիլմի նկարահանումների համար քասթինգի հայտարարությունը: Ի դեպ, ի սկզբանե ֆիլմը կոչվել է «Անապատի մարտիկը»: Այս մասին հայտնել է ֆիլմում նկարահանված դերասանուհիներից մեկը:
Հայտարարության մեջ ֆիլմի ռեժիսորը նշվում է որպես Ալան Ռոբերթս, ով հայտնի է որպես մի քանի պոռնոֆիլմերի ռեժիսոր:
Նրա մի քանի ընկերներ և գործընկերներ հաստատել են, որ վերջին ժամանակներս նա աշխատել է Արևելքի վերաբերյալ ինչ-որ նախագծում: Միաժամանակ, նրանք նկատել են, որ ռեժիսորը աչքի չի ընկել հակամահմեդական տրամադրություններով, և, ամենայն հավանականությամբ, նրան, ինչպես նաև դերասաններին, թյուրիմացության մեջ են գցել պրոդյուսորները:
Ամերիկյան լրատվամիջոցներին հաջողվել է նաև պարզել, թե ով է ֆիլմի պրոդյուսերը. նա 55-ամյա եգիպտացի ղպտի Նակուլա Բասելի Նակուլան է, որը բնակվում է Կալիֆոռնիայում: Ենթադրաբար, հենց նա է կազմակերպել ֆիլմի նկարահանումները և տեսանյութը տեղադրել համացանցում` Սեմ Բեյսիլի կեղծանվամբ:
