Coca-Cola ընկերությունը Skyfall-ի սահմանափակ սերիայի թողարկման համար գովազդային հոլովակ է պատրաստել, որում հերոսները տարբեր ձայներով վերարտադրում են Ջեյմս Բոնդի մասին ֆիլմի գլխավոր երաժշտությունը: Այս մասին հաղորդում է The Drum-ը:
Հոլովակում երիտասարդ տղան սրճարանում տեսնում է հաճելի մի աղջկա և, Skyfall -ի շշից Coca-Cola խմելով, սկսում է երգել Բոնդի մասին ֆիլմի մեղեդին, որը սկսում է երգել նաև աղջիկը: Սակայն խանդոտ ուղեկցողը աղջկան տանում է ավտոմեքենայով, իսկ հոլովակի հերոսն ուղևորվում է նրա հետևից:
Գովազդային հոլովակի կարգախոսն է «Բացահայտի՛ր քո մեջ 007 գործակալին»: Գովազդային հոլովակը պաշտոնապես կներկայացվի սեպտեմբերի 28-ին:
Coca-Cola-ն «007. Սքայֆոլի կոորդինատները» ֆիլմին ընդառաջ թողարկել է Skyfall սահմանափակ քանակությամբ շշեր և տարաներ: Փաթեթավորման դիզայնը սև գույն է `Ջեյմս Բոնդի դասական պատկերով:
Ֆիլմը վարձույթի դուրս կգա 2012 թվականի հոկտեմբերի վերջին:
