Նրանք, ովքեր քաղաքում մեքենա են վարում, նկատած կլինեն, որ այս տարվա հունվարից փողոցներում երթևեկող մեքենաների քանակը զգալիորեն նվազել է:
Սա նկատելի է նաև ուշադիր հետիոտների կողմից: Երթևեկող մեքենաների քանակի նվազումը, անշուշտ, պայմանավորված է նախևառաջ ԱՊՊԱ համակարգի ներդրումով: Սակայն պատճառը միայն դա չէ: Վերջին ամիսներին կենսամակարդակի անկումը, սոցիալական վիճակի վատթարացումը արդեն սկսել է էլ ավելի զգացնել տալ իրեն` կոնկրետ դրսևորումներ ունենալով: Բավական է միայն հիշել, որ վերջին 3-4 ամիսներին, 13 տարվա ընթացքում առաջին անգամ, նույնիսկ պաշտոնապես իրական միջին աշխատավարձը երկրում նվազել է: Սրան գումարվեց նաև բենզինի գների թանկացումը, ինչը կրակի վրա յուղ լցնելու էֆեկտ թողեց:
«Ռեգուլյար» տեսակի բենզինի 1 լիտրի գինը հոկտեմբերի վերջի 350 դրամից վերջին օրերին աստիճանաբար թանկանալով հասավ 410-420 դրամի: Պրեմիումի» 1 լիտրի գինը նույն ժամանակահատվածում 380 դրամից դարձավ 450 դրամ: Սա, իհարկե, ինչ-որ տեղ պայմանավորված էր միջազգային շուկայում գների աճով: Եթե հոկտեմբերի վերջին Brent տեսակի նավթի 1 բարելը միջազգային շուկաներում` բորսաներում, արժեր մոտ 85 դոլար, ապա վերջին օրերին այն տատանվում է 110 դոլարի շրջանակներում: Բենզինի գների աճ նկատվեց վառելիք ներմուծող աշխարհի գրեթե բոլոր երկրներում, այդ թվում` մեր հարևան Վրաստանում: «Ռեգուլյար» տեսակի բենզինի 1 լիտրի գինը հոկտեմբերի 1-ի 1.95 լարիից (մոտ 400 դրամ) այժմ հասել է 2.05 լարիի (մոտ 428 դրամ` երեկվա փոխանակման կուրսով): «Պրեմիումի» 1 լիտրի գինը Վրաստանում նույն ժամանակահատվածում 2 լարիից (ավելի քան 410 դրամ) դարձավ 2.1 լարի (440 դրամ):
Մեր տեղեկություններով, վերջին 1-2 ամսում բենզինի սպառման ծավալը նվազել է մոտ 10%-ով: Պաշտոնապես սա դեռ չի արձանագրվել. բենզինի վերաբերյալ վիճակագրությունը միշտ ստում է: Մաքսային մարմինները արձանագրում են ամսական մոտ 12 հազար տոննա բենզինի մաքսազերծում, ավելի քիչ, քան 1996թ.-ին (այս մասին բազմիցս խոսել է ՀՀ նախկին վարչապետ Հրանտ Բագրատյանը): Սակայն բենզինի գների աճի մասին խոսելիս պետք է նկատի ունենալ, որ նախկինում ևս նման տատանումներ, նույնիսկ` էլ ավելի կտրուկ թանկացումներ եղել են մեր շուկայում: Սակայն դրանք չեն հանգեցրել սպառման ծավալների էական կրճատման:
Այնպես որ, այս անգամ բենզինի սպառման կրճատումը պետք է համարել նախևառաջ կենսամակարդակի` բնակչության եկամուտների էական նվազման արդյունք: Կենսամակարդակի անկումը մեկ այլ կարևոր դրսևորում էլ ունի: Պաշտոնապես ՀՀ-ում վերջին երկու տարիներին նվազել է գազի սպառման ծավալը: 2008-ի համեմատ, 2009-ին նվազումը կազմել է 20%, իսկ 2010թ., 2009թ. համեմատ, այն կազմել է 18%: Մարդիկ իսկապես սկսել են գազից անցնել փայտի ու այն ամենին, ինչ կարող է վառվել: Հունվարի կեսերին ու փետրվարի սկզբներին նույնիսկ Կենտրոնի որոշ փողոցներով քայլելիս կարելի էր զգալ վառվող փայտի հոտը: Էլ չենք խոսում գյուղերի մասին, որտեղ վառում են ինչ պատահի:
Մի խոսքով, այս երկու ցուցանիշները` գազի և բենզինի սպառման ծավալների կրճատումը, մեր երկրում կենսամակարդակի լուրջ անկման ամենաառարկայական դրսևորումներն են: Եթե հաշվի առնենք նաև, որ Լիբիայում տեղի ունեցող դեպքերը դեռ կշարունակեն բարձր պահել ու բարձրացնել նավթի գինը, իսկ գազի գնի հերթական թանկացումը սպասվում է ապրիլի 1-ից, պատկերն ավելի ամբողջական կդառնա:
«Ժամանակ» օրաթերթ
