«Միացյալ Նահանգների պետքարտուղարի երկու տեղակալների հետ հանդիպումից հետո Սերժ Սարգսյանը փոխանակ սեփական ժողովրդի հետ խոսեր, գնացել էր Սանկտ Պետերբուրգ հանդիպման մանրամասները Մեդվեդևին զեկուցելու համար»,- «Առաջին լրատվականի» հետ զրույցում կարծիք հայտնեց Հայաստանի լիբերալ կուսակցության նախագահ Հովհաննես Հովհաննիսյանը` անդրադառնալով նախօրեին կայացած Մեդվեդև-Սարգսյան հանդիպմանը:
Հովհաննիսյանը նաև նշեց, թե ինքը վստահ չէ, որ գազի գինը չեն բարձրացրել. «Ռուսական կողմը գազի գինը բարձրացրել է, և շատ ակնհայտ է նրանց հայտարարությունից, որ Սերժ Սարգսյանն է հանձնարարել այստեղի «գազպրոմին», որ հասարակության համար գազի գինը չբարձրացնեն, որովհետև ռուսական «գազպրոմը» պարտավորություն ունի, և նրանք չեն կարող չբարձրացնել այդ գինը»:
Անդրադառնալով Ադրբեջանին ռուսական ընկերության կողմից վաճառված մարտական ուղղաթիռներին` Հովհաննիսյանը նշեց, որ դա ռուսական կողմի հստակ վերաբերմունքն է Հայաստանի իշխանություններին, երբ նա զինում է Ադրբեջանին այն պայմաններում, երբ մենք կանգնած ենք պատերազմական վտանգի առջև:
