Արդյոք կա՞ վիճակագրության, թե հանքերի շահագործման արդյունքում ինչ հիվանդություններ են առաջանում տվյալ բնակավայրերում, ինչ հետևողականությամբ են դրանք զարգանում, և համեմատած մյուս գոտիների հետ` այդ հիվանդությունները ինչ տոկոսային տարբերություն են տալիս: Այս հարցը ՀՀ առողջապահության նախարարին էր ուղղել ՀԱԿ խմբակցության պատգամավոր Լյուդմիլա Սարգսյանը: Առողջապահության նախարարն ասաց` թեպետ ինքը նորանշանակ նախարար է, բայց տիրապետում է վիճակագրական տվյալներին, չնայած կոնկրետ թվեր չհրապարակեց:
Երեկ Aravot.am-ի հետ զրույցում, անդրադառնալով թեմային, ՀԱԿ պատգամավորն ասաց, որ նախարարի պատասխանից տպավորություն է ստացել, որ նման վիճակագրություն ընդհանրապես գոյություն չունի: Ավելին, ըստ տիկին Սարգսյանի` ոչ ոք չի էլ փորձել անգամ զբաղվել այդ խնդիրներով, որովհետև դրանք տվյալ գերատեսչությունների և նախարարությունների համար, միևնույն է, լուծելի չեն:
«Հանքարդյունաբերության ոլորտը մոնոպոլիզացված է և գտնվում է ուղիղ իշխանության վերնախավի ձեռքին: Ոչ ոք որևէ նախարարի թույլ չի տա ինչ-որ միջոցներ ձեռնարկել: Քանի որ նախարարներն էլ լիագույն կախվածության մեջ են իշխանություններից ոչ թե իրենց մասնագիտական պարտավորությունները կատարելու, այլ նշանակվել-հրաժարվելու մասով, որևէ կերպ չեն փորձում ընդդիմանալ վարչապետին: Բնականաբար, ի վիճակի էլ չեն խնդիրներ լուծել»,- ասաց տիկին Սարգսյանը:
Տիկին Սարգսյանին հետաքրքրում էր նաև` արդյոք առողջապահության և բնապահպանության նախարարությունները համատեղ ջանքերով չե՞ն կարողանում հանքարդյունաբերող ընկերությունների նկատմամբ պատժամիջոցներ կիրառել: Հարցին հստակ պատասխան չհնչեց: Մինչդեռ թերթի զրուցակիցը կարծում է, որ ազգային իշխանությունը միայն կօգտագործեր բնապահպանական շարժումների կատարած աշխատանքը, նրանց ներկայացրած փաստերը, որոնք, ըստ էության, պետական գերատեսչությունների կողմից պետք է արվեին: «Ոչ ոք չի փորձում հանքերի շահագործման տարածքներում անգամ պարտադիր բժշկական ապահովագրության մասին մտածել: Պետությունը պետք է գոնե բարոյականություն ունենա և այդ մարդկանց պարտադիր բժշկական ապահովագրությունն իր վրա վերցնի»,- ասում է տիկին Սարգսյանը: Եթե նշյալ նախարարները «կոմպլեքս» ունեն բնապահպանների հետ առնչվելու, տիկին Սարգսյանը պատրաստ է կապող օղակ հանդիսանալ:
