Իրանական Press TV-ի փոխանցմամբ՝ Իրանի խորհրդարանի նախագահ Ալի Լարիջանին դատապարտել է ԱՄՆ-ում հակաիսլամական ֆիլմի նկարահանումը, որը վիրավորում է Մուհամմեդ մարգարեին.
«ԱՄՆ-ի կառավարությունը պետք է պատասխանատվություն կրի իսլամական սրբերին վիրավորելու համար: Ակնհայտ կեղծիք են ամերիկացի քաղաքական գործիչների այն հայտարարությունները, թե իրենք աջակցում են և հարգանք են տածում տարբեր մշակույթների հանդեպ»:
Իրանի մշակույթի և իսլամական կողմնորոշման նախարար Մոհմամմադ Հոսեյնին նույնպես դատապարտել է այդ ֆիլմի նկարահանումը՝ այն որակելով որպես իսլամին վիրավորելու հերթական օրինակ, որին աջակցում են ԱՄՆ-ի առաջնորդները:
Այդ ֆիլմի հետ կապված՝ այսօր իրանցի ուսանողները բողոքի ակցիա են կազմակերպելու Թեհրանում Շվեյցարիայի դեսպանատնից ոչ հեռու, որը երկրում ներկայացնում է ԱՄՆ-ի շահերը: Իսկ վաղը՝ ուրբաթօրյա աղոթքից հետո, Իրանի բազմաթիվ քաղաքներում նույնպես պլանավորված են բողոքի ակցիաներ:
