Կենսաթոշակային համակարգում նախատեսվող փոփոխությունները գործատուներին ստիպելու են զերծ մնալ նոր աշխատատեղեր ստեղծելու մտքից, քանի որ յուրաքանչյուր նոր աշխատատեղ կենսաթոշակային համակարգին վճարվող որոշակի պարտադիր գումարներ է ենթադրում: ԱԺ-ում այսօր նման տեսակետ հայտնեց ՀՅԴ պատգամավոր Արծվիկ Մինասյանը:
«Կենսաթոշակային համակարգի սպասվելիք փոփոխությունները նպաստելու են ոչ թե կենսաթոշակառուների վիճակի բարելավմանը, այլ միայն որոշակի շրջանակների շահերի առաջմղմանը:
Մենք պնդում ենք, որ Հայաստանում պետք է ներդնել կամավոր կուտակային համակարգ, ինչը չի բերի ֆինանսական շուկաների ռիսկի: Մինչդեռ ակնհայտ է, որ ռիսկն առկա է պարտադիր կուտակային համակարգին անցում կատարելու պարագայում: Կառավարության առաջարկը նպաստում է ազգային խնայողությունների անկմանը, ռիսկային պայմաններում տնտեսական աճի կանգին, իսկ հետո՝ ռեցեսիայի երևույթին»,- ասաց նա:
Արծվիկ Մինասյանի խոսքով` կենսաթոշակային համակարգի փոփոխությունների հարցը սերունդների հարցն է, հետևաբար այն պետք է դնել հանրաքվեի: «Ժողովուրդն ինքը պետք է որոշի՝ ուզո՞ւմ է օգտվել այդ համակարգից, թե՞ ոչ»,- նշեց խորհրդարանականը:
